-सेन्छेलुङ लिम्बू

विभागीय टोली नेपाल पुलिस क्लबलाई २–० गोल अन्तरले पराजित गरेर लक्ष्मी हुन्डाई मनाङ मस्र्याङ्दीले उपाधि जित्ने निश्चित भएपछि यस वर्षको शहीद स्मारक रेडबुल ए डिभिजन लिगको उत्सुकता १३ फागुनमै समाप्त भयो । निरन्तर उपाधिको सशक्त दावेदार रहँदै आएको मनाङले आठ वर्षपछि १७ फागुनमा लिग जितेर रु.७५ लाख पुरस्कार हात पार्‍यो ।

लिग जितेपछि खुशी मनाउँदै मनाङका खेलाडी । तस्वीरः कौशल अधिकारी/कान्तिपुर

नकआउट प्रतियोगितामा अब्बल देखिएको मनाङ अन्तिम खेल खेल्नुअघि नै ३५ अंक जोडेर बाजी मार्न सफल भएको थियो । मनाङपछि सर्वाधिक अंक जोडेको एनएमबी ब्याङ्क मछिन्द्र क्लबले रु.४५ लाख पुरस्कार पायो । सुपर लिगमा सबै खेल जितेर ३४ अंक जोडेको मछिन्द्रको यो अहिलेसम्मकै ठूलो उपलब्धि हो । साविक विजेता लक्ष्मी ब्याङ्क थ्रीस्टार तेस्रो, पुलिस चौथो, संकटा पाँचौं र सशस्त्र प्रहरी बल (एपीएफ) छैटौं स्थानमा रहे ।

अर्को विभागीय क्लब नेपाल आर्मी भने सुपर लिगमा पुग्नै सकेन । विभागीय टोली भन्दा क्लबहरू बलियो हुनुलाई विश्लेषकहरू फूटबल व्यावसायिक बन्दै गएको संकेत मान्छन् । त्यति मात्रै होइन, दर्शक अब मनाङ र थ्रीस्टार जस्ता स्थापित क्लबहरूमा मात्र सीमित रहेनन् । यो पटक मछिन्द्रले समेत क्लबको जर्सी वितरण गर्‍यो– दर्शकलाई । विश्लेषक संजीव मिश्र भन्छन्, “क्लबहरूको समर्थक बढ्नु फूटबल विकासका लागि सकारात्मक पक्ष हो ।”

राष्ट्रिय टीमका पूर्व कप्तान हरि खड्का बलिया र कमजोर भनिएका टीमहरूबीचको अंकमा ठूलो अन्तर नदेखिनु र उपाधिमा एउटै क्लबको वर्चस्व नहुनुले पनि लिगलाई प्रतिस्पर्धात्मक बनाएको बताउँछन् । स्टारै–स्टारले भरिएको टीम भन्दा कम चर्चित क्लब अगाडि आउँदा राम्रा खेलाडीहरूलाई पनि थप मिहिनेतका लागि दबाब पर्ने खड्काको अनुभव छ । हुन पनि, राष्ट्रिय टीमका लागि अहिलेसम्म कुनै क्याप जित्न नसकेका कर्ण लिम्बू (२७) ले यस पटक सर्वाधिक ११ गोलको चमत्कार देखाए ।

संकटाका प्रशिक्षक राजुकाजी शाक्य खेलाडीहरूको पारिश्रमिक, क्लबको लगानी, समर्थकको वृद्धि आदिलाई व्यावसायिकताको सूचकको रूपमा लिनुपर्ने बताउँछन् । तर अहिलेकै लिगको सन्दर्भमा पनि सुधार गर्नुपर्ने पक्ष धेरै छन् । जस्तो, १३ टीम सहभागी लिग पाँच रेफ्री र सात सहायक रेफ्रीको भरमा सम्पन्न गरियो । १५ पुसदेखि १७ फागुनसम्म चलेको लिगमा उनीहरूले कुल ९३ खेल खेलाए ।

फूटबल विकासका लागि लिगलाई लामो समय खेलाउनुपर्ने मान्यता छ । छोटो अवधिमा धेरै खेल्नु पर्दा खेलाडीले क्षमता अनुसार प्रदर्शन गर्न नसक्ने पूर्व कप्तान खड्का बताउँछन् । रेफ्रीको भूमिका विवादित हुनुमा पनि एउटैले धेरै खेल खेलाउनुलाई कारक मानिन्छ । यो लिगमा मनाङका नवीन न्यौपानेलाई प्रतिबन्ध लगाउने निर्णय पनि विवादरहित बन्न सकेन ।

दुई वर्षअघि पुरस्कार राशी तीन गुणा बढाएर रु.७५ लाख पुर्‍याइए पनि लिगका लागि क्लबहरूले अझै पर्याप्त तयारी गरेको देखिंदैन । एन्फाका एक अधिकारका अनुसार यसपटक क्लबहरूले दुई तीन हप्ताभन्दा बढी तयारी गरेनन् । मैदान अभावमा सबै खेल दशरथ रंगशालामै सीमित गरियो । प्रशिक्षक शाक्य भन्छन्, “खेलाडीहरूले नयाँ–नयाँ मैदानमा खेल्ने वातावरण पाएकै छैनन् ।”

साप्ताहिक खबरपत्रिका हिमालबाट

प्रतिकृया दिनुहोस