मकालुबाट लुक्ला बेसक्याम्पका लागि १७ जेठ २०५९ मा उडेको चार्ली युनिफर्म (९ एन–एसीसीयु) कल साइन भएको हेलिकप्टर  (हे. तस्वीर) अझै भेटिएको छैन । आठ शेर्पा भरिया र रुसी पाइलटसहित दुई जना चालक दलका सदस्य बोकेको एम आई–१७ हेलिकप्टर वर्षाका बेला एक सातासम्म खोज्दा पनि नभेटिएपछि खोजकार्य स्थगित गरिएको थियोे ।

हराएको हेलिकप्टर माओवादी लडाकुले अपहरण गरेर भारत पुर्‍याएको हल्ला समेत चलेको थियो त्यतिबेला । तर मकालु बरुण राष्ट्रिय निकुञ्जमा चरासम्बन्धी अध्ययन अभियानमा आएको टोलीले विमान अरुण उपत्यकामा चक्कर लगाएर अचानक वेपत्ता भएको बतायो । उक्त घटनासम्बन्धमा अहिलेसम्म विश्वास गर्न सकिने अनुमान भने हेलिकप्टर हिमालमा ठोक्किएपछि गएको हिमपहिरोमा पुरिएको भन्ने नै हो ।

हिमालमाथि विमान उडाउनु मौसम र भू–बनोटका कारण चुनौतिपूर्ण नै हुन्छ जसले खोजी र उद्दार कार्यमा समेत बाधा पुर्‍याउँछ ।

साउन २०२९ मा काठमाडौंबाट दिल्लीका लागि उडेको शाही नेपाल वायुसेवा निगमको डिसी–३ डकोटा विमान ६ यात्रु र ४ चालक दलका सदस्यसहित वेपत्ता भयो ।

भारतका लागि तत्कालीन नेपाली राजदूत समेत चढेको उक्त विमान १० दिनपछि भारतीय एयर फोर्सले ढोरपाटन क्षेत्रमा दुर्घटनाग्रस्त अवस्थामा फेला पारेको थियो । विमानमा रहेका चालक दलका सदस्यसहित सबै यात्रुको निधन भएको थियो । उक्त विमानको खोजी गर्न गएको पिलाटस पोर्टर विमानसमेत दुर्घटनाग्रस्त भएको थियो ।

त्यस्तै असार २०४९ मा बैंककबाट काठमाडौंका लागि उडेको थाई इन्टरनेशनल एयरबस–३१० नेपाली आकाशमा आइसकेपछि वेपत्ता भएको थियो । बादलले ढाकेका बेला काठमाडौं विमानस्थलको आकाशमा आएकोे उक्त विमान ४ दिनपछि लाङटाङ राष्ट्रिय निकुञ्जमा दुर्घटनाग्रस्त अवस्थामा भेटिएकोे थियो । नेपाली उड्डयनको इतिहासमै दोस्रो ठूलो मानिएको उक्त दुर्घटनामा ११३ जनाको ज्यान गयो ।

२०५३ सालमा जोमसोमबाट पोखरा जाँदै गरेको लुम्बिनी एयरको ट्विनअटर विमान १८ यात्रुसहित दुर्घटनामा पर्दा पनि समयमै खोजी गर्न मौसम र भू–बनोटका कारण संभव भएको थिएन भने बनराज्यमन्त्री गोपाल राई र नेपालका वरिष्ठ संरक्षणविदहरु सहित २२ यात्रु बोकेको एमआई १७ हेलिकप्टर भदौ २०६३ मा कञ्चनजंघा नजिक वेपत्ता भएको थियो । उक्त विमान दुर्घटना भएको ५ दिनपछि मात्रै भेटिएको थियो ।

पछिल्लो समय अर्घाखाँचीको मसिने लेकमा दुर्घटनामा परेको नेपाल वायु सेवा निगमको ट्विनअटर विमान पनि एक दिनपछि मात्रै भेटिएको थियो त्यो पनि यात्रुको मोबाइल फोन ट्र्याक भएपछि ।

प्रतिकृया दिनुहोस