थप समाचारशुक्रबार, चैत्र १४, २०७०
चोरी शिकारी शून्य, गैंडाको संख्या बढ्यो
चोरी शिकार गर्नेलाई कारबाही गर्न थालिएपछि विगतमा ठूलो सङ्ख्यामा हुने गैँडाको चोरी शिकार रोकिएको छ । विगत वर्षहरूमा चोरी शिकारबाट वर्षमा ३७ वटासम्म गैँडा मारिएका थिए ।
निकुञ्ज तथा वन्यजन्तु संरक्षण महानिर्देशक मेघबहादुर पाण्डेले सरकारी तथा गैरसरकारी निकायको सहयोगमा चोरी शिकार तथा अवैध व्यापारमा संलग्न व्यक्ति पक्राउ गरी कार्वाही अघि बढाइएकाले चोरी शिकार हुन नपाएको बताए ।
गत वर्ष अभियानका रुपमा चलाइएको कार्यक्रमका कारण एउटा पनि गैँडाको चोरी शिकार नभएकाले यस वर्ष गैँडाको शून्य चोरी शिकार वर्ष मनाइएको छ । चोरी शिकार निकासी र अवैध व्यापारमा सामेल भएका ७०० भन्दा बढी अभियुक्तलाई पक्राउ गरी राष्ट्रिय निकुञ्ज तथा वन्यजन्तु संरक्षण ऐन २०२९ अनुसार कानुनी दायरामा ल्याइएको छ ।
हालसम्म भएको पछिल्लो गैँडाको गणनाअनुसार एकसिँगे गैँडाको सङ्ख्या ५३४ पुगेको छ । गैँडाको सङ्ख्या वृद्धि हुनाको मुख्य कारण चोरी शिकार रोक्न चलाइएको कार्यक्रम नै रहेको महानिर्देशक पाण्डेले दाबी गरे ।
राष्ट्रिय निकुञ्ज तथा वन्यजन्तु संरक्षण विभागले तीन वर्षअघि सन् २०११ मा गरेको गणनाले एक सिँगे गैँडाको सङ्ख्या गत गणनाभन्दा १२५ ले बढेको छ । सन् २०११ भन्दा अगाडि गरेको गणनामा गैँडाको सङ्ख्या ४०९ थियो ।
हाल विश्वमा तीन हजार २०० को सङ्ख्यामा एकसिँगे गैँडा छन् । नेपाल र भारतका सीमित निकुञ्ज र आरक्षलगायत क्षेत्रमा मात्र पाइने सो गैँडाको मुख्य वासस्थान नेपालको चितवन राष्ट्रिय निकुञ्ज र भारतको काजिरङ्गा राष्ट्रिय निकुञ्ज हुन् ।
नेपाल भ्रमणमा आउने ६० प्रतिशत पर्यटकको मुख्य गन्तव्यका रुपमा राष्ट्रिय निकुञ्ज र संरक्षित क्षेत्र रहने गरेको महानिर्देशक पाण्डेले बताएका थिए ।