खोटाङ खाल्ले–८ का २२ वर्षीय अशोक खतिवडाको खुकुरी प्रहारबाट १९ वर्षीया अहेब कविता दाहाल गम्भीर घाइते भएकी छन् । खुकुरी प्रहारबाट अहेब दाहालको घाँटी, टाउको र देब्रे हातमा गहिरो चोट लागेको छ ।

दिक्तेल–९ सोल्माकी दाहाललाई खतिवडाले अस्पतालको आकस्मिक कक्षमै गएर १६ चैत दिउँसो खुकुरी प्रहार गरेको प्रहरीले जनाएको छ ।

बेहोस अवस्थामा रहेकी दाहाललाई फिस्टेल एयरको हेलिकप्टरमार्फत काठमाडौँ लगिएको छ ।

वर्ष दिन अघिदेखिको प्रेम सम्बन्धलाई दाहालले अस्वीकार गरेका कारण खतिवडाले खुकुरी प्रहार गरेको बुझिएको जिल्ला प्रहरी कार्यालय खोटाङका प्रहरी नायब उपरीक्षक गोविन्दकुमार साहले बताए ।

साहका अनुसार विवाहका लागि गरिएको प्रस्तावलाई अस्वीकार गरेका कारण दाहालमाथि आक्रमण भएको हो । खतिवडाले प्रेमिकाको हत्या गरेर आफूले आत्महत्या गर्ने मनसाय राखेको बयान दिएको प्रहरीले बताएको छ ।

खुकुरी प्रहार गर्ने खतिवडालाई प्रहरीले भाग्दै गरेको अवस्थामा पक्राउ गरेको हो । उनको साथमा रहेको झोलाबाट डोरी समेत बरामद गरिएको जिप्रकाले जनाएको छ ।
रासस

प्रतिकृया दिनुहोस