मुलुकको पूर्वी नाका काकडभिट्टा भएर तेस्रो मुलुकबाट हुने सुपारीको आयातमा दोब्बर वृद्धि भएको छ ।

तेस्रो मुलुकबाट सुपारी आयात गरी नेपालमा उत्पादित भन्दै भारतर्फ अवैध निकासी गरिने सुपारी प्रहरीले निरन्तर बरामद गरिरहेकाले पनि सुपारीको ठूलो आयात तस्करीकै लागि भएको पुष्टि हुन्छ ।

काकडभिट्टास्थित मेची भन्सार कार्यालयको तथ्याङ्कअनुसार, गत आवमा सात हजार ९३१ मेट्रिक टनमात्र सुपारी आयात भएकामा चालु आर्थिक वर्षको ८ महिनामा रु एक अर्ब ४५ करोड मूल्य बराबरको १६ हजार ६१४ मेट्रिक टन सुपारी आयात भएको छ ।

चालु आवमा रु ६ करोड ५८ लाख मूल्य बराबरका सुपारी, विभिन्न प्रकारका सामान र गाडी भन्सार कार्यालयमा आवश्यक कारबाहीका लागि प्रहरीद्वारा दर्ता गरिएको छ ।

भन्सारले यस्ताखाले सामानको लिलामीबाट उठेको रकमको ३५ प्रतिशत रकम पुरस्कारस्वरूप सामान पक्रने र सुराकीलाई प्रदान गर्दै आइरहेको छ ।

चालु आर्थिक वर्षको आठ महिनामा झापा भन्सार कार्यालयले सुपारीको आयातबाट रु ६८ करोड राजश्व प्राप्त गरेको कार्यालय प्रमुख मुक्ति पाण्डेले जानकारी दिए ।

काकडभिट्टामा ९८ प्रतिशतभन्दा बढी इन्डोनेसियाबाट र दुई प्रतिशतको हाराहारीमा थाइल्यान्डबाट सुपारी भित्रिने गरेको कार्यालय प्रमुख पाण्डेले बताए ।

झापा उद्योग वाणिज्य सङ्घका अध्यक्ष उमेश डालमिया भन्छन, “सरकारले सुपारी आयातको परिमाण निर्धारण गर्नुपर्ने र सुराकी र सामान पक्रनेलाई वितरण गर्ने कमिसन घटाउनुपर्ने देखिन्छ ।”

इलाका प्रहरी कार्यालय काँकरभिट्टाका अनुसार साउनदेखि हालसम्ममा तीन लाख ५० हजार किलो सुक्खा सुपारी भारततर्फ लाने क्रममा दसगजा क्षेत्रबाट बरामद गरिएको छ ।

“तेस्रो मुलुकबाट नेपालमा खपतका लागि भित्र्याइएको सुपारी सरकारले अन्य मुलुकमा निकासीका लागि प्रतिबन्ध गरेकाले त्यस्ता सुपारीलगायतका सामान नियन्त्रणमा लिइएको हो ।”

प्रतिकृया दिनुहोस