आन्दोलनमा उत्रिएका खेलाडीसँग वार्ताको नेतृत्व गरेका क्यानका उपाध्यक्ष चतुरबहादुर चन्दसँग गरिएको कुराकानीः

तस्वीरः देबकी बिष्ट

क्रिकेट खेलाडी र क्यानबीचको विवाद समाधान भएको हो ?

तीनबुँदे सहमति भएर विवाद समाधान भएको छ । नेपाललाई देश–विदेशमा चिनाउने खेलाडीले उठाएका आफ्ना हक–अधिकारका विषयलाई सम्बोधन गर्न खेलाडी, प्रशिक्षक, क्यान, सरकारका प्रतिनिधि सम्मिलित समिति बनेको छ ।

दीर्घकालीन समाधान भयो कि तत्काललाई टालटुल मात्र ?

समिति बनेकै दीर्घकालीन समस्या समाधान गर्न हो । यो समितिले गरेको सिफारिशले क्यानलाई योजना तर्जुमा गर्न सघाउने छ ।

खेलाडीलाई तलब समेत नदिनुको कारण के हो नि ?

तलबको कुराले मिडियामा बढी चर्चा भयो । तर, पछिल्लो दुई वर्षयता क्रिकेटरहरूले वार्षिक रु.२५–३० लाख कमाएका छन् । बंगलादेशमा खेल्दा पनि दैनिक रु.१५ हजार भत्ता दिइएको थियो । आठ कर्पोरेट हाउसबाट मासिक रु.१५ हजार पाएका छन् । खेलाडी र क्यानबीच ६–६ महीनामा तलब दिने सम्झौता पालना नभएको चाहिं आंशिक सत्य हो ।

यो घटनाले क्यान निकै कमजोर र खेलाडी बलिया देखिए नि हैन ?

क्यान कमजोर छैन र हुँदैन पनि । तर कार्यशैली कमजोर भएको हो । यस्तो हुनुमा क्यान नेतृत्व बढी जिम्मेवार छ । जुनसुकै आस्थाको भए पनि क्यानमा राजनीति गर्नुहुँदैन ।

नेपाली क्रिकेट विकासका लागि तपाईंहरूसँग के योजना छन् ?

अब हामी जुनियर क्रिकेटमा लाग्नुपर्छ । हाम्रो मुख्य ध्यान ब्याकअपका लागि जुनियर खेलाडी उत्पादन गर्ने हुनुपर्छ । सरकारले मैदान बनाउने प्रतिबद्धता जनाइसकेको छ ।

साप्ताहिक खबरपत्रिका हिमालबाट

प्रतिकृया दिनुहोस