हङकङमा कविता वाचन गर्दै वसन्तकुमार चौधरी । तस्वीर: देवराज राई

नेपाली भाषा, साहित्य र संस्कृतिलाई विश्वभर रहेका नेपालीहरुमाझ पुर्‍याउने उद्देश्य सहित पोहोर अमेरिकाबाट प्रारम्भ भएको काव्य यात्राको हङकङ संस्करण भव्यरुपमा सम्पन्न भएको छ ।

हङकङको पाकिस्तानी क्लवमा कवि चौधरीले देशभक्ति पूर्ण र प्रेम भावना समेटिएका करिव २ दर्जन कविता, मूक्तक वाचन गरे ।

वसन्त चौधरीको विश्व काव्य यात्रामा हङकङमा रहेका कवि–कवियत्रीहरु, लेखक–साहित्यकार र समाजका अगुवा अभियन्ताहरु उपस्थित थिए ।

हङकङ नेपलीज फाउण्डशेनको आयोजनामा र मिसन टु हेल्पको सहयोगमा काव्ययात्रा हङकङ सम्पन्न भएको हो ।

कार्यक्रममा कवि गीतकार चौधरीका कविताहरुको ई बुक ‘मेरा कविताहरु’ को तेस्रो संस्करण विमोचन गरियो ।

युकेमा रहेकी कवियत्री लारा, मिसन टु हेल्पका प्रेसीडेन्ट बबी लामा, चलचत्रि निर्देशक राजेन्द्र शलभ पनि कार्यक्रममा सहभागी थिए ।

काव्य यात्राको क्रममा कविहरु टंक साम्बाहाम्फे, नरेश सुनुवार, दीपा एवाई राई, हाङयुग अज्ञात, लालबहादुर गुरुङले पनि आफ्ना कविताहरु वाचन गरेका थिए ।

काव्य यात्रा यसवर्ष विश्वका विभिन्न देशका २० शहरहरुमा पुग्ने छ ।

“नेपाली भाषा, साहित्य, संस्कृतिलाई लाई विश्व सामू पुर्‍याउनु पर्छ । संसारको जुनसुकै ठाउँमा रहेपनि आफ्नो हृदयको कुनामा नेपाललाई सजाउनु पर्छ । नेपाल नबिर्सौ, नेपाली भाषालाई नबिर्सौं ।“ वसन्त चौधरीले हङकङमा रहेका नेपालीलाई सम्बोधन गर्दै भने ।

हङ्कङमा पढने नेपाली बालबालिकाहरुका साथ कवि वसन्त चौधरी । तस्वीर: देवराज राई

हङकङमा चौधरीले नेपाली विधार्थीहरु अध्ययन गर्ने सेन्ट्रल प्राइमरी स्कुलका सिनियर विधार्थीहरु माझ बालकविता सुनाएका थिए भने विद्यालयको पुस्तकालयलाई पुस्तकसमेत प्रदान गरे । नेपाली भाषा, साहित्य र संस्कृतिको प्रवर्द्धनमा सहयोग पुर्‍याउने संस्थाको उद्देश्यसँग मेल खाएकाले कार्यक्रमकाे आयोजना गरिएको हङकङ नेप्लिज फाउन्डेसनका अध्यक्ष किसन राईले स्वागत मन्तव्यमा व्यक्त गरेका थिए ।
देवराज राई, हङकङबाट

प्रतिकृया दिनुहोस