ब्ांगलादेशमा भएको टी–२० विश्वकप प्रतियोगितामा नेपालले गरेको प्रदर्शन र भर्खरै मलेशियामा भएको एसीसी प्रिमियर लिगमा तेस्रो हुँदै एसीसी च्याम्पियनशिपमा छनोट भएपछि नेपालमा क्रिकेट सम्बन्धी सामग्रीको विक्री ४० प्रतिशतले बढेको व्यापारीहरु बताउँछन् ।

दशरथ रंगशाला परिसरमा विगत २० बर्षदेखि सलिम स्पोर्टस् इन्टरप्राइजेज् सञ्चालन गरिरहेका धर्ममान बज्राचार्यले नेपालले बंगलादेशमा विश्वकप खेलेसँगै क्रिकेटका सामाग्रीको विक्री बढेको बताए । उनले क्रिकेट जर्सी, प्याडलगायतका सामग्रीको बिक्रीका बढे पनि सबैभन्दा बढी चाहीं बल र ब्याट बिक्री भइरहेको जानकारी दिए ।

उनको पसलबाट दैनिक ५ वटासम्म ब्याट र २० वटा बल विक्री भइरहेको उनको भनाई छ ।

थपाथली चोकमा रहेको आरबी स्पोर्टस् सेन्टरका राजन सिंहले अरु बेला एक वर्षमा विक्री हुने भन्दा बढी परिमाणका सामग्री साढे दुई महिनामै विक्री गरेको बताए । उनले भने, “अहिले त सामान पुर्‍याउनै धौ धौ छ ।”

पूर्व राष्ट्रिय तेक्वान्दो खेलाडी दीपक बिष्ट पनि पहिलेको तुलनामा क्रिकेट सामग्रीको विक्री ४०÷५० प्रतिशतले बृद्घि भएको बताए । उनका अनुसार विष्टको पसलबाट क्रिकेटको जर्सीमात्रै दैनिक करिब २५ हजारसम्मको विक्री भइरहेको छ ।

नेपालले टी–२० विश्वकपमा भाग लिएपछि नेपालमा क्रिकेट क्रेज ह्वात्तै बढेको उनले बताए ।

काठमाडौंको बजारमा क्रिकेट साम्राग्रीको  मुल्य

काठमाडौंको  बजारमा पाइने भारतबाट आयातित ब्याट २ हजारदेखि २ हजार ५ सयसम्ममा पाइन्छ भने पाकिस्तानबाट आयात हुने ब्याटलाई ८ देखि ९ हजारसम्म पर्छ ।

बच्चाहरुले खेल्न बढी प्रयोग गर्ने रबरको बल (टेनिस बल) ८ सयदेखि १६ सय सम्ममा पाइन्छ भने गुणस्तर हेरी छालाको बललाई २ सयदेखि ६ सय रुपैयाँ सम्म पर्छ ।

राष्ट्रिय प्रतियोगिताहरुमा प्रगोग गरिने सामान्य बल ४ हजारसम्म पर्छ । स्टम्पको मुल्य भने १२५ देखि ३०० सम्म छ ।

त्यसैगरी ब्याटिङ्ग  प्याडको मुल्य  ७५०  देखि ३ हजार,  किपिङ्ग प्याड १ हजार ५० देखि २ हजार,  हेल्मेट ६५० देखि २ हजार ५ सय, थाइ प्याड २७५ देखि ७ सय, एल्बो प्याड १७५ देखि ४५० र  सेन्टर प्याड ६० देखि ६५० सम्ममा पाइन्छ ।

नेपालले टी–२० खेल्दा लगाएको डिजाइनको जर्सीको मुल्य १,१०० छ ।

दीपेन्द्र सापकोटा, काठमाडौं

प्रतिकृया दिनुहोस