थप समाचारबिहीबार, बैशाख २५, २०७१
योजना आयोगको उपाध्यक्षमा गोविन्द पोखरेल
प्रधानमन्त्री तथा मन्त्रिपरिषद्को कार्यालय सिंहदरबारमा २४ वैशाखमा बसेको मन्त्रिपरिषद्को बैठकले डा गोविन्द पोख्रेललाई राष्ट्रिय योजना आयोगको उपाध्यक्षमा नियुक्त गरेको सञ्चार मन्त्री मीनेन्द्र रिजालले जानकारी दिएका छन् ।
मन्त्री रिजालका अनुसार बैठकले पहिलेदेखिको गृहकार्यका आधारमा गरिएको ७२ वटा नगरपालिकाको गठन र सञ्चालनको प्रस्तावलाई स्वीकृत गरेको छ । त्यस्तै भविष्यमा थप नगर क्षेत्रको निर्धारणका लागि सिफारिस गर्न प्रा केशवानन्द गिरीको अध्यक्षतामा एक समिति पनि गठन गरिएको छ ।
यसैगरी बैठकले एसियाली विकास बैंकबाट समुदायले व्यवस्थापन गर्ने सिँचाइ आयोजनाका लागि रु तीन अर्ब वैदेशिक सहयोग स्वीकार्ने निर्णय गरेको छ ।
विराटनगरमा केही दिनयता देखिएको कमलपित्त, हेपाटाइटिस बीलगायतका स्वास्थ्य समस्यालाई दृष्टिगत गरी आवश्यक सहयोग पु¥याउन केन्द्रमा नेपाल सरकारका मुख्य सचिवको समन्वयमा मोरङ जिल्लाका प्रमुख जिल्ला अधिकारीमार्फत थप सङ्क्रमण रोक्नका लागि सबै किसिमका उपाय अवलम्बन गरिने पनि उनले जानकारी दिएका थिए ।