अन्तर्वार्ता/विचारसोमबार, आषाढ २, २०७१

‘विधानसम्मत अध्यक्ष मै हुँ’

हिमालखबर

राष्ट्रिय प्रजातन्त्र पार्टी र राष्ट्रिय जनशक्ति पार्टीबीच एकीकरण भएको एक वर्षपछि अध्यक्ष बनेका पशुपतिशम्शेर राणासँग गरिएको कुराकानीः

विवादबीच अध्यक्ष बन्नुभयो, कस्तो लागेको छ ?

विधानसम्मत अध्यक्ष म नै हुँ । मैले यसलाई पार्टीले गरेको उपयुक्त निर्णयका रुपमा लिएको छु ।

अर्का नेता लोकेन्द्रबहादुर चन्दले पनि आफूलाई अध्यक्ष भन्नुभएको छ नि ?

चन्दजीले आफूलाई अध्यक्ष भन्नुभएको मैले पनि पत्रपत्रिकामा पढें । तर, उहाँको भनाइ विधानसम्मत छैन ।

एक वर्षअघिको चक्रीय सहमति अनुसार चन्द नै अध्यक्ष हुनुपर्ने होइन र ?

एक वर्षअघि हामीले चक्रीय प्रणालीका बारेमा छलफल गरेका थियौं । तर महाधिवेशनले त्यसलाई अस्वीकार गरिसकेको छ । त्यसकारण अहिले चक्रीय सहमतिको कुरा उठाउनु सान्दर्भिक छैन ।

चन्द पक्षीय नेताहरूले तपाईंलाई अध्यक्ष नमान्ने निर्णय गरेको सुनिन्छ नि ?

एक–दुई दिनभित्रै कसरी अघि बढ्ने भनेर उहाँहरूसँग छलफल गर्दैछु । जुन छलफलबाट सहमतिमा पुग्न सकिनेमा विश्वस्त छु ।

राप्रपा फुटको नजिक पुगेको हो त ?

लामो छलफल र वार्तापछि एक वर्षअघि एकीकरण भएको राप्रपालाई फुट हुनबाट जोगाउन हर ढंगबाट प्रयास गर्नेछु । वार्ता र छलफलपछि पार्टी एकजुट हुनेछ भन्ने मेरो विश्वास छ ।


साप्ताहिक खबरपत्रिका हिमालबाट

प्रतिकृया दिनुहोस

हिमालखबर जनमत

नयाँ सरकारको नेतृत्व कुन पार्टीले गर्नुपर्छ?

परिणाम हेर्नुस्

Loading ... Loading ...