४ मंसीरमा भएको निर्वाचनमा दुई क्षेत्रबाट विजयी चार जना नेताले छाडेका क्षेत्रमा ८ असारमा भइरहेको उप–निर्वाचनको सरगर्मी खासै देखिएन । बर्खे झरी लागेकाले किसानहरू खेतीपातीको चटारोमा छन् । संविधानसभा–व्यवस्थापिका संसद्को समीकरणलाई पनि खासै असर नपार्ने भएकाले दलहरूले यसलाई प्रतिष्ठाको लडाइँभन्दा बढी मानेको देखिंदैन । यद्यपि, चारवटै निर्वाचन क्षेत्रमा प्रमुख दलका शीर्ष नेताहरूले चुनावी अभियानमा सहभागिता जनाएका छन् ।

गत निर्वाचनमा कांग्रेस सभापति सुशील कोइराला चितवन–४ र बाँके–२, वरिष्ठ नेता शेरबहादुर देउवा डडेल्धुरा र कैलाली–६, एमाले वरिष्ठ नेता माधवकुमार नेपाल काठमाडौं–२ र रौतहट–१ तथा उपाध्यक्ष वामदेव गौतम प्युठान–१ र बर्दिया–१ बाट निर्वाचित भएकोमा कोइरालाले चितवन–४, नेपालले काठमाडौं–२, गौतमले बर्दिया–१ र देउवाले कैलाली–६ मा छाडेका थिए । ती क्षेत्रमा विद्युतीय मतदान (इलेक्ट्रोनिक भोटिङ) भइरहेको निर्वाचन आयोगले जनाएको छ ।

संविधानसभा सदस्यका लागि उप–निर्वाचनअन्तर्गत चितवन क्षेत्र नम्बर–४ मा मतदान गर्दै मतदाता । तस्वीरः सविता श्रेष्ठ

२०६४ को संविधानसभा निर्वाचनमा काठमाडौं–१ मा प्रयोग भएको विद्युतीय मेशीन राजधानी बाहिर पहिलो पटक प्रयोग हुँदैछ । तर, सर्वोच्च अदालतको आदेश बमोजिम निर्वाचन आयोगले यो निर्वाचनमा ‘नेगेटिभ भोटिङ’ (राइट टु रिजेक्ट) को व्यवस्था गर्नुपर्नेमा समय अपुग भएको भन्दै गरेन ।

प्रतिस्पर्धामा कांग्रेस–एमाले

कोइरालाले छाडेको चितवन–४ मा एक स्वतन्त्र सहित १२ उम्मेदवार प्रतिस्पर्धामा छन् । एमालेले गत निर्वाचनमा उम्मेदवार रहेकी दिलकुमारी रावल (पार्वती) लाई नै उठाएको छ भने कांग्रेसले पूर्व जिल्ला सभापति रामकृष्ण घिमिरे र एमाओवादीले २०६४ मा समानुपातिकतर्फ सभासद् रहेका खुसीराम पाख्रिनलाई उम्मेदवार बनाएको छ ।

कांग्रेसले आफ्नो गढ मान्दै आएको ७ गाविस र भरतपुर नगरपालिकाका ५ वडा रहेको यो क्षेत्रमा कांग्रेस र एमाले दुवैले जित्ने दाबी गरेका छन् । गत निर्वाचनमा कांग्रेस सभापति कोइरालाले २० हजार ७६० मत ल्याएर विजयी भएका थिए भने एमाओवादीका चित्रबहादुर श्रेष्ठले १० हजार ७३९ र एमालेकी रावलले १० हजार ६० मत पाएका थिए । तर, यो पटक घिमिरे र रावलबीच मुख्य प्रतिस्पर्धा हुने देखिन्छ । गत निर्वाचनपछि थपिएका ५ हजार ६०६ गरी ६५ हजार २९९ मतदाता रहेको यो क्षेत्रमा ३१ स्थानका ८१ मतदान केन्द्रमा मतदान भइरहेको छ ।

नेपालले छाडेको काठमाडौं–२ मा एमाओवादीले गत निर्वाचनकै उम्मेदवार लीलामणि पोखरेललाई उठाएको छ भने एमालेले केन्द्रीय सदस्य कृष्णगोपाल श्रेष्ठ र कांग्रेसले दीपक कुईंकेललाई उम्मेदवार बनाएको छ । गत निर्वाचनमा नेपाल २१ हजार ७४८ मत ल्याएर विजयी भएका थिए भने कांग्रेसकी प्रतिमा गौतमले १२ हजार ४७५ र एमाओवादीका पोखरेलले ७ हजार १५४ मत ल्याएका थिए । तीनै जना उम्मेदवारले आफूले जित्ने दाबी गरे पनि मुख्य प्रतिस्पर्धा श्रेष्ठ र कुईंकेलबीचमा हुने देखिन्छ ।

देउवाले छाडेको कैलाली–६ मा एमालेले गत निर्वाचनकै उम्मेदवार महेश्वर पाठकलाई उठाएको छ भने कांग्रेसले पुष्करनाथ ओझा र एमाओवादीले सुन्दरराज रेग्मीलाई उम्मेदवार बनाएको छ । थारू समुदायको उल्लेख्य संख्या रहेको यो क्षेत्रमा मधेशी जनअधिकार फोरम (लोकतान्त्रिक) का लक्ष्मण थारू र राप्रपा नेपालका राजेश भण्डारीको पनि प्रभाव देखिन्छ । तर, मुख्य प्रतिस्पर्धा ओझा र पाठककै बीचमा हुनेछ । धनगढी नगरपालिकासहित दुई गाविस उर्मा र फूलबारी रहेको यो क्षेत्रमा ६१ हजार ८१७ मतदाता छन् । गत निर्वाचनमा यहाँबाट देउवा १६ हजार ४८९ मत ल्याएर विजयी भएका थिए भने निकटतम प्रतिद्वन्द्वी एमालेका पाठकले ८ हजार ५६३ मत पाएका थिए ।

गौतमले छाडेको बर्दिया–१ मा एमाओवादीले गत निर्वाचनकै उम्मेदवार भुवनकुमार थारूलाई उठाएको छ भने एमालेले श्याम ढकाल र कांग्रेसले सोदे बिष्टलाई उम्मेदवार बनाएको छ । गत निर्वाचनमा गौतम १८ हजार ३४७ मत ल्याएर विजयी हुँदा एमाओवादीका थारूले ११ हजार ५२८ र कांग्रेसका भुवनेश्वर चौधरीले ८ हजार ५९८ मत ल्याएका थिए । थारू समुदायको उल्लेख्य संख्या रहेको यो क्षेत्रमा त्रिपक्षीय प्रतिस्पर्धा हुने देखिन्छ । थारूलाई ३० फागुन २०६० मा बर्दियाको कालिका—४ मुनालबस्तीका नारायण सापकोटा र डिलबहादुर खड्कालाई घरबाट अपहरण गरी हत्या गरेको आरोप छ । उनी विरुद्धको जाहेरी प्रहरीले दर्ता नगरेपछि मृतक खड्काकी पत्नी लक्ष्मीले पुनरावेदन अदालत नेपालगञ्जमा रीट दायर गरेकी छन् ।

सविता श्रेष्ठ चितवन, तुफान न्यौपाने नेपालगञ्ज, बच्चु विक धनगढी

प्रतिकृया दिनुहोस