खेलकुदशुक्रबार, आषाढ १३, २०७१

‘गोल्डेन बुट’का हकदार

हिमालखबर

विश्वकप फूटबलअन्तर्गत समूह चरणका खेलका आधारमा ‘गोल्डेन बुट’का लागि सात खेलाडीको संभावना बढी देखिन्छ । सर्वाधिक गोलकर्तालाई दिइने ‘गोल्डेन बुट’को दौडमा थोमस मुलर, लियोनल मेसी, नेयमार, जेम्स रोड्रिग्वेज, करिम बेन्जेमा, आर्जेन रोविन र रोविन भान पर्सी अगाडि छन् ।

नेयमार, रोड्रिग्वेज र बेन्जेमा विश्वकपका नयाँ स्टार हुन् । मुलर, मेसी, रोविन र भान पर्सीले भने यसअघिका विश्वकपमा पनि खेलेका थिए ।

गएको विश्वकपको तुलनामा बढी गोल भइरहेको प्रतियोगिताको समूह चरणका ४८ खेलमा १३६ गोल भइसकेका छन् ।

जर्मनीका लागि समूह चरणमा चार गोल गरिसकेका प्लेमेकर मुलर अर्जेन्टिनाका मेसी र ब्राजिलका नेयमारसँगै बलियोस्थितिमा छन् । चार गोलसँगै मुलरले एक गोलमा एसिस्ट गरेका छन् । क्रिष्टियानो रोनाल्डाको पोर्चुगललाई नीरिह पार्ने क्रममा ह्याट्रिक पूरा गरेका २४ वर्षीय मुलरले अमेरिकामाथि जीत हात पार्ने क्रममा निर्णायक गोल गरे ।

अर्जेन्टिनाका २६ वर्षीय स्टार मेसीले समूह चरणका तीन खेलमै चार गोल ठोकेका छन् । गएका दुई विश्वकपमा जादू देखाउन नसकेका उनले जारी विश्वकपमा दर्शनीय गोल गर्दै आफ्नो दावेदारी पेश गरेका छन् । आफ्नो पहिलो खेलमै बोस्निया हर्जगोभिनाविरुद्ध गोल गरेका उनले इरानविरुद्ध हेर्नलायक गोल गरे । नाइजेरियाविरुद्ध उनले दुई गोल हाने ।

विश्वकपको उदघाटन खेलमै आयोजक ब्राजिलका २२ वर्षीय स्टार नेयमारले आफ्नो जादू देखाए । क्रोएशियासँग एक–शुन्यले पछि परेको स्थिति उल्टाउँदै उनले पेनाल्टीमार्फत् दोस्रो गोल थपे । उनले समूह चरणको दोस्रो खेलमा मेक्सिकोको बलियो रक्षापंक्ति तोड्न सकेनन् । तर, उनले क्यामरुनविरुद्धको खेलमा भने सहजै दुई गोल ठोके र आफूलाई मुलर र मेसीसँगै दौडमा अघि राखे ।

मुलर, मेसी र नेयमारलाई चुनौति दिने पंक्तिमा जेम्स रोड्रिग्वेज, करिम बेन्जेमा, आर्जेन रोविन, रोविन भान पर्सी र जेर्डन शाकिरी छन् । २२ वर्षीय कोलम्बियन प्लेमेकर रोड्रिग्वेजले तीन गोल गरिसकेका छन् भने दुई गोलमा एसिस्ट गरेका छन् ।

फ्रान्सका स्ट्राइकर करिम बेन्जेमाले पनि ‘गोल्डन बुट’ पाउने दौडमा आफ्नो दावी पेश गरेका होण्डुरससँग दुई गोल गरेका उनले स्वीट्जरल्याण्डविरुद्ध एक गोल ठोके । उनले दिएको दुईटा पास गोलमा परिणत भएको छ ।

नेदरल्याण्ड्सका आर्जेन रोविन र रोविन भान पर्सी दुवै जना ‘गोल्डेन बुट’ का प्रतिस्पर्धि हुन् । दुवैले तीन–तीन गोल ठोकेका छन् । स्पेनेलाई गोल वर्षाउने क्रममा दुई र अष्ट्रेलियाविरुद्ध एक गोल गरेका उनले दुई गोलमा एसिस्ट पनि गरेका छन् । प्रतियोगितामा तीन गोल गरेका भान पर्सीले स्पेनविरुद्ध गरेको गोल दर्शनीय थियो ।

दोस्रो चरणमा स्वीट्जरल्याण्डलाई पुर्‍याउने क्रममा ह्याट्रिक पूरा गरेका जेर्डन शाकिरी पनि दावेदारको रुपमा छन् । स्वीट्जरल्याण्डबाट खेल्ने भएकाले बलिया टीमका खेलाडीको तुलनामा उनलाई कम आँकिएको छ ।

नकआउट चरणमा ‘गर या मर’को अवस्थाबाट गुज्रिनु पर्दा नाम चलेका खेलाडीलाई झन् बढी दबाब हुन्छ । त्यसैले विश्वकपको समाप्तिसम्ममा नयाँ इतिहास पनि कोरिन सक्छ ।

दीपेन्द्र सापकोटा, काठमाडौं

प्रतिकृया दिनुहोस

हिमालखबर जनमत

नयाँ सरकारको नेतृत्व कुन पार्टीले गर्नुपर्छ?

परिणाम हेर्नुस्

Loading ... Loading ...