इन्टरनेट तस्वीर

सन् १९८२ को विश्वकप फूटबलको समूह चरणको खेलमा अल्जेरियाले जर्मनीलाई २–१ ले हरायो । जर्मनीलाई हराएर उच्च मनोवलमा रहेको अल्जेरिया समूह चरणकै खेलमा अष्ट्रियासँग २–० ले पराजित भयो ।

तर, चिलीलाई ३–२ ले हराएपछि भने अल्जेरियाको अघिल्लो चरणमा जाने प्रवल संभावना थियो । त्यस्तोस्थितिमा जर्मनीले अष्ट्रियालाई दुईभन्दा बढी गोल अन्तरले हराउँदा अल्जेरिया अघिल्लो चरणमा पुग्ने थियो । तर, जर्मनीले समूह चरणको आफ्नो अन्तिम खेलमा छिमेकी अष्ट्रियाविरुद्ध एकभन्दा बढी गोल हानेन ।

अहिलेजसरी समूह चरणमा एकै समूहका अन्तिम खेलहरु एउटै समयमा नहुने त्यो बेला जर्मनी र अष्ट्रियाबीचको खेल दिक्कलाग्दो थियो । जर्मनीले एक गोल गरेपछि दुवै टीमले एक–आपसमा पास खेलेरै ९० मिनेट बिताएका थिए । त्यही ‘म्याच फिक्सिङ’ का कारण जर्मनी र अष्ट्रिया दोस्रो चरणमा पुगे भने अल्जेरिया विश्वकपबाट बाहिरियो ।

बत्तिस वर्ष अघि आफूविरुद्ध जर्मनीले गरेको त्यही ‘म्याच फिक्सिङ’ को बदला लिने दाउका साथ अल्जेरिया मैदानमा ओर्लदैं छ, १६ असार राति १.४५ बजे । त्यतिबेला जर्मनीले आफ्नो टोलीलाई घात गरेकाले अल्जेरियाले यो विश्वकपमा बदला लिने बताइसकेको छ । तर, जर्मन प्रशिक्षक जोचिम लोउले भने विगतको कुरा बिर्सनुपर्ने बताएका छन् । “फूटबलमा बदलाको भावनाले प्रतिस्पर्धा गर्नु हुँदैन,” उनले संचारमाध्यममा प्रतिक्रिया दिएका छन् ।

इन्टरनेट तस्वीर

अल्जेरियाका प्रशिक्षक भाहिद हालिलहोद्जिकले आफूहरु जर्मनीसँग नडराएको बताएका छन् । उनले भनेका छन्, “बलियो जर्मनीविरुद्ध हामी खरो उत्रने छौं ।”

समूह चरणमा चार गोल गरेका थोमस मुलरलाई जर्मनीले हतियारको रुपमा उतार्दै छ । तर, जर्मनीमा स्टार खेलाडीको भने कमी छैन ।

अल्जेरियामा भने नाम कहलिएका खेलाडी कमै छन् । तर, उसले फरवार्ड इस्लाम स्लिमानीमा बढी भर गर्नु पर्नेछ । उनले ब्राजिलमा जारी विश्वकपमा दुई गोल गरिसकेका छन् ।

फ्रान्सविरुद्ध नाइजेरिया

ब्राजिलमा जारी विश्वकपअन्तर्गत १६ असार राति ९.४५ बजे फ्रान्स र नाइजेरिया भिड्दै छन् ।

आफ्ना स्टार खेलाडी फ्रेन्क रिवेरीलाई गुमाएको फ्रान्स अहिले लयमा छ । सन् १९९८ को विश्वकप विजेता फ्रान्सका खेलाडीमा अनुभवको कमी छैन । स्ट्राइकर करिम बेन्जेमाबाट बढी आशावादी फ्रान्स जसरी पनि क्वाटरफाइनलमा पुग्न चाहन्छ ।

सन् १९९४, १९९८ मा दोस्रो चरणमा पुगेको नाइजेरिया भने क्वाटरफाइनलमा पुगेर नयाँ इतिहास रच्ने दाउमा छ । अर्जेन्टिनी स्टार लियोनल मेसीलाई जवाफ फर्काउने क्रममा अर्जेन्टिानाविरुद्ध दुई गोल गरेका अहमद मुसा नाइजेरियाको भरपर्दा हतियार हुन् ।

दीपेन्द्र सापकोटा, काठमाडौं

प्रतिकृया दिनुहोस