जिल्ला शिक्षा कार्यालय महोत्तरीको रु २४ लाख अनुदानमा जलेश्वरमा निर्माण गरिएको महेन्द्र आदर्श माविको चार कोठे भवन १७ असार विहान विभिन्न ठाउँमा प्वालै प्वाल परेर भत्किएको छ । उक्त भवनको छत ढलाई १६ असारराति २ बजे गरिएको थियो ।

व्यवस्थापन समिति नरहेको विद्यालयका प्रधानाध्यापक हरिप्रसाद दाहालसहित सात जना शिक्षकको निर्माण समितिले निर्माण गरेको भवन ढलान गरेको पाँच घण्टामै भत्किएको स्थानीय रञ्जीतकुमार राउतले बताए ।

मापदण्डअनुसारको बालुवा, सिमेन्ट प्रयोग नगरिएको र रातारात ढलान गरिएका कारण छत ढलान गरिएको केही बेरमै भवन भत्किएको स्थानीय सुरेश साहले बताए ।

यसैबीच भवनमा प्रयोग गर्नका लागि ल्याइएका ८/१० ब्यान्डल फलामे डन्डी भवनमा प्रयोग नगरी निर्माण स्थल नजिकै झाडीमा लुकाइ राखिएको अवस्थामा स्थानीयवासीले फेला पारेका छन् ।

यता प्राधानाध्यापक दाहालले भने आफूहरुले भवन निर्माणको सम्पूर्ण जिम्मा भारत विहारको सीतामढी जिल्लाअन्तर्गत चन्दपारा बस्ने मोहम्मद कलामलाई दिएको र निजले आफ्नो मनोमानीअनुसार भवन बनाएको आरोप लगाएका छन् ।

ढलान गरेको केही बेरमै विद्यालय भवन भत्किएपछि स्थानीयको पहलमा दोषीउपर छानबिन र कारबाहीका लागि समितिसमेत बनाइएको छ ।
रासस

प्रतिकृया दिनुहोस