ब्राजिल विरुद्ध ७–१ ले खेल जितेपछि खुशियाली मनाउँदै गर्दै जर्मनीका खेलाडी बायाँबाट क्रमशः गोलकिपर रोबर्ट जिलर, डिफेन्डर म्याथियस गिन्टर, फरवर्ड थोमस मुलर, डिफेन्डर फिलिप ल्हाम, मिडफिल्डर बास्टियन स्वेसटेइगर र मिडफिल्डर मेसुट ओजिल । तस्वीर: एएफपी

ब्राजिलको बेलो होरिजोन्तेमा रङ्गशालामा भएको पहिलो सेमीफाइनल खेलमा जर्मनीले ब्राजिललाई ७–१ को फराकिलो गोलअन्तरले पराजित गर्दै फाइनल चरणमा प्रवेश गरेको हो । छैटौँपटक उपाधि जित्ने लक्ष्य बोकेर मैदानमा उत्रेकोे ब्राजिल आफ्ना लाखौँ समर्थकलाई रुवाउँदै प्रतियोगितामा ७–१ को लज्जास्पद हार बेर्होन बाध्य बन्यो ।

विश्वकपको इतिहासमा नै जर्मनीले ब्राजिललाई यति फराकिलो गोल अन्तरले पराजित गरेको यो पहिलोपटक हो भने सेमिफाइनल खेलमा सात गोल गर्दै जर्मनीले नयाँ कीर्तिमानसमेत कायम गरेको छ । हालसम्मको विश्वकपको सेमिफाइनलमा कुनै पनि टोलीले सात गोल गर्न सकेका थिएनन् ।

यस्तै जर्मनीले फराकिलो अन्तरले जित हासिल गरेको यो दोस्रोपटक हो । यसअघि सन् २००२ मा भएको विश्वकपमा जर्मनीले साउदी अरेबियालाई ८–० गोलअन्तरले पराजित गरेको थियो ।

खेल शुरु भएदेखि नै जर्मनी मैदानमा हावी भएको थियो । मध्यान्तरसम्ममा जर्मनीले ५–० को अग्रता बनाइसकेको थियो । जर्मनीले ७ मिनेटको अवधिमै ४ वटा गोल गर्‍यो । जर्मनीले लगातार गोल वर्षा गरिरहँदा ब्राजिल समर्थकहरु असमञ्जसमा देखिन्थे । खेल मैदानमा लाग्थ्यो, जर्मनीका प्रत्येक खेलाडीले गोल गर्दैछन् ।

जर्मनीले ब्राजिलविरुद्ध लगातार गोल गरेपछि ब्राजिल समर्थकहरुको प्रतिक्रियाका तस्वीरहरु । तस्वीरः एएफपी

यो जितसँगै जर्मनी १२ वर्षपछि फाइनल चरणमा प्रवेश गरेको छ । यसअघि सन् २००२ मा भएको विश्वकपमा जर्मनी फाइनलमा पुगेको थियो ।

विश्वकप फुटबलको इतिहासमा ब्राजिलको यति फराकिलो गोल अन्तरले पराजित भएको पनि पहिलोपटक हो । यसअघि सन् १९९८ मा ब्राजिल फ्रान्ससँग ३–० गोलअन्तरले हार बेहोरेको थियो ।

जर्मनीको जितमा आन्द्रेइ शुर्ले र टोनी क्रुजले समान दुई–दुई गोल गरे भने थोमस मुलर, सामी खडीरा तथा मिरास्लाभ क्लोजले समान एक–एक गोल थपे ।

जर्मनीका थोमस मुलरले खेल सुरुवाती ११ औं मिनेटमा पहिलो गोल गर्दै खाता खोलेपछि जर्मनीले लगातार गोल बर्सायो । मिरोस्लाभ क्लोजले खेलको २२ औं मिनेटमा एक गोल थपे । क्लोजले गोल गरेको दुई मिनेट पनि बित्न क्रुजले लगातार दुई गोल थपे । उनले खेलको २४ र २५ औँँ मिनेटमा गोल गरे ।

यस्तै जर्मनीका अर्का खेलाडी सेमी खदिराले खेलको २९औँ मिनेटमा एक गोल थपेपछि जर्मनले खेलको पहिलो हाफसम्म ५–० गोलको अग्रता बनायो । खेलको दोस्रो हाफमा ब्राजिल गोल फर्काउन निकै प्रयासरत रहे पनि उल्टो दोस्रो हाफमा दुई गोल खायो ।

खेलको ६९औँ र ७९औँ मिनेटमा शुर्लेले दुई गोल थप्दै जर्मनीलाई ७–१ को सहज जित दिलाए ।

मेक्सिकन रेफ्री मार्को रोड्रिग्वेज ब्राजिलका डिफेन्डर डेभिड लुइज र जर्मनीका फरवर्ड थोमसले विवाद गर्न थालेपछि छुट्टयाउँदै । तस्वीरः एएफपी

यस जितसँगै जर्मनीका खेलाडी मिरास्लाभ क्लोजले सबैभन्दा बढी गोल गर्ने खेलाडीको नाममा नयाँ कीर्तिमान कायम गरेका छन् ।

उनले विश्वकपमा १६ गोल गर्दै सबैभन्दा बढी गोल गर्ने खेलाडीका रूपमा नयाँ कीर्तिमान कायम गरेका हुन् । यसअघि उक्त कीर्तिमान ब्राजिलका स्ट्राइकर रोनाल्डोको नाममा थियो । रोनाल्डोको गोलसङ्ख्या १५ रहेको छ ।

ब्राजिलका लागि भने ओस्कारले खेलको अन्तिम समयमा एक गोल फर्काएका थिए ।

फाइनलमा जर्मनीले अर्जेन्टिना र नेदरल्याण्ड्सका बीच हुने दोस्रो सेमीफाइनलको विजेताको सामना गर्ने छ । नेपाली समय अनुसार २५ असार राति १ः४५ मा अर्जेण्टिना र नेदरल्याण्ड्स भिड्दैछन् ।

तेस्रो स्थानका लागि ब्राजिल दोस्रो सेमिफाइनलमा हार्ने टिमसँग प्रतिस्पर्धा गर्ने छ ।

विश्वकप फुटबलमा ब्राजिलको यो अहिलेसम्मकै खराब प्रदर्शन मानिएको छ ।

प्रतिकृया दिनुहोस