खेलकुदआइतबार, आषाढ २९, २०७१
विश्वकप फुटबल: नेदरल्यान्ड्स तेस्रो

नेदरल्याण्ड्सका आर्जेन रोबेनलाई घेरेका ब्राजिली खेलाडी डेभिड लुइज (बायाँ) र पाउलिन्ह्वो । तस्वीरः एपी
ब्राजिलस्थित ब्रासिलिया रङ्गशालामा २८ असार राति भएको खेलमा नेदरल्यान्ड्सले विश्वकप आयोजक ब्राजिललाई ३–० गोलले हराउँदै प्रतियोगितामा तेस्रो स्थान हासिल गरेको हो । गत संस्करणको खेलमा उपविजेता बनेको नेदरल्यान्ड्स यसपटक भने तेस्रो स्थानमा चित्त बुझाउन बाध्य भयो ।
सेमिफाइनलमा अर्जेन्टिनासँग पेनाल्टी सुटआउटमा २–४ गोलअन्तरले हार व्यहोरेपछि नेदरल्यान्ड्स तेस्रो स्थानका लागि ब्राजिलसँग भिडेको हो ।
नेदरल्यान्ड्सका फरवार्ड रोबिन भान पर्सीले खेलको सुरुवाती ३ मिनेटमा नै पेनाल्टीमार्फत पहिलो गोल गर्दै खाता खोलेका थिए । ३० वर्षीय भान पर्सीले जारी प्रतियोगितामा व्यक्तिगत चार गोल गरेका छन् भने अन्तर्राष्ट्रियस्तरको प्रतियोगितामा उनको गोल सङ्ख्या ४७ पुगेको छ ।

नेदरल्याण्ड्सका आर्जेन रोबेन (बायाँ) र स्टेफन डि व्रिज ब्राजिललाई हराउँदै तेस्रो स्थान प्राप्त गरेपछि पदक लगाएर खुशी हुँदै । तस्वीरः एपी
ब्राजिलका कप्तान थिएगो सिल्भाले नेदरल्यान्ड्सका आर्जेन रोबेनलाई डी एरियामा लडाएपछि अल्जेरियन रेफ्री डिजामेल हाइमोउडीले नेदरल्यान्ड्सलाई पेनाल्टीको अवसर दिएका थिए ।
दोहोरो पहेँलो कार्ड खाएका ब्राजिलका कप्तान सिल्भा एक खेलको प्रतिबन्धपछि तेस्रो स्थानका लागि भएको खेलमा पुनः टोलीमा फर्केका थिए ।
नेदरल्यान्ड्सका अर्का खेलाडी डाली बिल्न्टले खेलको पहिलो हाफको १७औँ मिनेटमा अर्को एक गोल थप्दै अग्रता दोब्बर बनाए । उनले करिब १५ यार्डबाट प्रहार गरेको बलले सिधै जाली चुमेपछि नेदरल्यान्ड्सको अग्रता दोब्बर बनेको थियो ।
यसैगरी नेदरल्यान्ड्सका अर्का खेलाडी जर्जिनिओ विज्नाल्डुमले खेलको दोस्रो हाफको अत्तिरिक्त समयमा थप एक गोल गर्दै नेदरल्यान्ड्सलाई ३–० को सहज जित दिलाए । उनले डारेल जानमाटले दिएको क्रसबललाई सदुपयोग गर्दै गोल गरेका थिए ।

तेस्रो स्थानका लागि भएको खेलमा घाइते खेलाडी ब्रजिली स्टार नेइमार पनि उपस्थित थिए । खेल हारिसकेपछि बायाँबाट क्रमशः नेइमार, जो, लुइज गुस्ताभो, दानी अल्भेस, म्यक्सवेल र रेमायर्स । तस्वीरः एपी
खेलअवधिभर गोल फर्काउन निकै प्रयासरत रहेको ब्राजिल आम घरेलु दर्शकलाई निरास बनाउँदै प्रतियोगितामा चौथो स्थानमै चित्त बुझाउन बाध्य भयो । ब्राजिलले जारी प्रतियोगितामा १४ गोल खाएको छ भने पछिल्लो दुई खेलमा मात्र उसले १० गोल खान पुग्यो ।
यसअघि जर्मनीसँगको सेमिफाइनल भिडन्तमा उसले सात गोल खाएको थियो । सो भिडन्तमा ब्राजिल जर्मनीसँग ७–१ को लज्जास्पद हार व्यहोर्दै विश्वकप इतिहासमा नै पहिलोपटक सबैभन्दा बढी गोल खाने टोलीका रुपमा चिनियो ।
प्रतिकृया दिनुहोस
ताजा अपडेट
हिमालखबर जनमत
