वेम्ब्लीमा ८ असोजदेखि शुरु मुद्दाको बुधबार आठ घन्टाको सुनुवाई पश्चात् अब ११ असोज विहिबार फैसला हुने अपेक्षा गरिएको छ ।

गत सिजनको २३ अक्टोबरमा क्युपीआरको मैदानमा टेरीलाई घरेलु टोलीका रक्षक एन्टोन फर्डिनान्डलाई “नराम्रो शब्द” प्रयोग गरेको आरोप लगाइएको छ । ३ फेब्रुअरीमा एफएले मुद्दाको टुङ्गो नलागेसम्म कप्तानको पदमा रहन नपाउने भन्दै उनलाई इङ्गलण्ड कप्तानबाट बर्खास्त गरेको थियो। केहि दिन पछि नै तत्कालिन व्यवस्थापक फाबियो कपेलोले आफुसँग सल्लाह नगरी उनलाई कप्तानबाट हटाइएको भन्दै राजीनामा दिएका थिए ।
टेरीले आफुले नराम्रो  भाषा बोलेको स्विकारेता पनि के, कुन उद्देश्य र कुन सन्दर्भमा बोलेको जस्ता कुराहरुको स्पष्ट प्रमाण नभेटिएपछि जुलाई २३ मा वेस्टमिन्सटर मजिस्ट्रेट अदालतले उनलाई सफाइ दियो । तर जुलाई २७ मा एफएले उनीहरुकै भाषामा “टेरीले फर्डिनान्डप्रति जाति अथवा/र रङ्गसँग सम्बन्धित अपमानजनक शब्द अथवा/र अपशब्द शब्द प्रयोग अथवा/र व्यवहार गरेको” आरोप लगाएर छुट्टै मुद्दा दायर गर्यो । र सेप्टेम्बर २३ आईतबारका दिन उनले इङ्गलण्डको राष्ट्रिय टोलीबाट संन्यासको घोषणा गरे ।

एफएको व्यवहारले इङ्गलण्ड राष्ट्रिय टोलीमा आफ्नो भुमिका असुरक्शित भएको टेरीले बताएपनि एफएका सचिबले सो भनाईले आफु निराश र अचम्भित भएको जनाएका थिए । मुद्दा शुरु भएपछि चेल्सीका इङ्गलण्ड पुर्व व्यवस्थापक फाबियो कपेलो, चेल्सीका पुर्व प्रशिक्षक रे विल्किन्स, पुर्व व्यवस्थापक अभ्राम ग्रान्ट तथा चेल्सीका लेफ्ट ब्याक एस्ली कोलले उनलाई समर्थनमा बोल्दै आएका छन् ।

मुद्दामा दोषी ठहरिएको  खन्डमा उनी ४ भन्दा बढी  खेलहरुको निम्ति निलम्बित हुनेछन् यद्यपी शनिबार आर्सनलविरुद्धको खेलमा भने सहभागीता जनाउन सक्नेछन् ।

सन्यासको असर
जोन टेरीको संन्यासपछि इङ्गलण्डले एक अनुभवी र उत्कृष्ट सेन्टर हाफलाई गुमाएको तथ्यमा कुनै शङ्का छैन । ७८ अन्तर्राष्ट्रिय खेल खेलेका उनीसँग कुशल नेतृत्व दिने क्षमता र बलमा राम्रो नियन्त्रणको कला छ। राष्ट्रिय टोलीका व्यवस्थापक रोए हज्सनले उनलाई टोलीमा फर्कन आग्रह गर्ने सम्भावना भएता पनि टेरीले संन्यासको निर्णयलाई उल्ट्याउने सम्भावना हाललाई न्युन देखिन्छ।

उनको अनुपस्थितिमा म्यान्चेस्टर युनाइटेडका रियो फर्डिनान्ड राष्ट्रिय टोलीमा फर्कन सक्ने छन्। एन्टोन फर्डिनान्डका दाई रियोको खस्केको फर्म र टेरीसँगको उनको सम्बन्धमा बढेको चिसोपनका कारण ड्रेसिङ रुममा हुनसक्ने अस्वस्थ वातावरणलाई ध्यानमा राख्दै हज्सनले रियोलाई युरो २०१२ को इङ्गलण्ड टोलीमा समावेश गरेका थिएनन् ।

इङ्गलण्डको लागि चार ठुला प्रतियोगिता खेलिसकेका उनी बिना हज्सनको टोली निश्चय पनि कमजोर हुनेछ । र २०१४ को विश्व कप छ्नौट चरणका खेलहरुको लागि उसलाई भरपर्दो सेन्टर ब्याक आवश्यक छ । हाल टेरीको विकल्पको रुपमा हज्सनसँग गेरी केहिल, जोलियन लेस्कट र फिल यागिएल्का छन् तर यिनीहरुसँग पर्याप्त अन्तर्राष्ट्रिय अनुभवको कमी तथा रियो फर्डिनान्डको फिटनेस र फर्ममा आएको सुधारका कारण उनको लागि राष्ट्रिय टोलीको ढोका खुल्न लगभग पक्का छ ।

संन्यास लिएपछि उनले क्लब करीयरमा राम्ररी ध्यान दिन पाउने हुँदा यसको प्रत्यक्ष फाइदा उनको क्लब चेल्सीले नै लिनेछ । १८ वर्षको उमेरदेखि चेल्सीमा रहेका उनी क्लबप्रति एकदमै समर्पित खेलाडी हुन् भन्नेमा दुईमत छैन । त्यसैकारण कम्तिमा अझै तीन वर्षसम्म चेल्सीमा खेल्ने छन् भन्दा फरक नपर्ला । तर इङ्गलण्डको टोलीमा फर्कने हो या होईन भन्ने कुरा विश्व कप छनौटमा उसको प्रदर्शनले नै निर्क्यौल गर्नेछ ।

प्रतिकृया दिनुहोस