दुई दिनदेखि परेको वर्षाले कमला नदीमा आएको बाढीले पूर्वी तटबन्ध भत्काएपछि सिरहा, सारश्वरको १ र २ नम्बर वडाका ६० घर डुबानमा परेको स्थानीय विमल गुप्ताले जानकारी दिएका छन् ।

बाढीले गाउँ डुबानमा परेपछि अन्नपात र धनमाल नोक्सान भएको छ भने गाउँलेहरु विस्थापित भएका छन् ।

“आज बिहान ६ बजे आएको बाढीले गाउँ डुबायो, यहाँ भागाभाग छ ,” गुप्ताले भने । गाउँ डुबानमा पर्दा पनि चारजना प्रहरीबाहेक उद्दारका लागि कोही नआएको गुप्ताले गुनासो गरे ।

मन्दिरमा पूजा गर्न पुगेकी स्थानीय ६० वर्षीया महिला घाइते भएकी र अरु के कति क्षति भएको छ भन्ने अझै थाहा भइनसकेको स्थानीय देवेन्द्र यादवले जानकारी दिए ।

सिरहाका प्रहरी उपरीक्षक पूर्णचन्द्र जोशीले बाढीले गाउँ बगाएको सूचना पाएको र प्रहरी परिचालन गरिसकेको बताएका छन् ।

उनले भने, “कमलाको पूर्वी तटबन्ध नै भत्काएको सूचना पाएकाले चिकना, विष्णुपुर प्ररा, भोक्राहा लगायतका गाउँ पनि डुबानमा परेका छन् । सबै ठाउँमा उद्धारका लागि प्रहरी परिचालन गरिसकेका छौँ ।”
रासस

प्रतिकृया दिनुहोस