तस्वीरः रासस

मलेशियाका मानव संशाधनमन्त्री दातुक रिचार्ड रियट जइमले घरेलु कामदार पठाउन प्रस्ताव गरेको हो । नेपाल भ्रमणमा रहेका मलेशियाका मानव संशाधनमन्त्री जइमले ५ भदौमा श्रम राज्यमन्त्री टेकबहादुर गुरुङसँग भेटेर घरेलु कामदार लैजाने वातावरण निर्माण गर्न आग्रह गरेका छन् ।

जइमको प्रस्तावपछि नेपालले घरेलु कामदार पठाउने विषयमा समझदारीपत्र (एमओयू)को मस्यौदा बनाउन कार्यदल गठन गरिने श्रम राज्यमन्त्री गुरुङले जानकारी दिए । उनका अनुसार घरेलु कामदार र सामान्य कामदार लैजाने विषयमा एमओयूको मस्यौदा बनाउन श्रम मन्त्रालयका सहसचिवको नेतृत्वमा कार्यदल गठन गरिने छ ।

कार्यदलले दुई महीनाभित्र एमओयू तयार पार्ने उनले जानकारी दिए । मलेशियाले अरु देशसँग पनि घरेलु कामदार ल्याउने सम्झौता गरेकाले कार्यदलले त्यसबारे पनि अध्ययन गर्नेछ ।

गुरुङले भने, “कार्यदलले घरेलु कामदार पठाउने विषयमा अझै गहन गरेपछि मात्र हस्ताक्षर हुने छ ।”

मलेसियाका मानव संसाधनमन्त्री जइमसँग नेपाली पक्षले नेपाली कामदारलाई मलेशियामा जाँदा लाग्ने दस्तुर कम गर्न पनि आग्रह गरेको छ । बायोमेट्रिक प्रणाली लागू गर्दा नेपाली कामदारलाई थप आर्थिक भार पर्ने भएकाले त्यसबारे पुनःविचार गर्न आग्रह गरिएको मन्त्री गुरुङले जानकारी दिए ।

नौ सदस्यीय प्रतिनिधिमण्डलको नेतृत्व गर्दै ४ भदौमा नेपाल आएका मन्त्री जइम ५ भदौमा मलेशिया फर्किने छन् ।
रासस

प्रतिकृया दिनुहोस