११ भदौमा व्यवस्थापिका–संसद्को महिला, बालबालिका, ज्येष्ठ नागरिक तथा समाजकल्याण समितिको सभापति चयन भएकी रञ्जुकुमारी झासँग गरिएको कुराकानीः

महिला, बालबालिका समितिको सभापतिको जिम्मेवारी पाउँदा कस्तो लागेको छ ?

पहिलो पटक सभासद् भएकी मैले सभापतिको जिम्मेवारी पाउनु महत्वपूर्ण अवसर हो । यो जिम्मेवारी कुशलतापूर्वक निर्वाह गर्न सक्नेमा विश्वस्त छु ।

तपाईंलाई यो जिम्मेवारी किन दिइएको होला ?

महिला आन्दोलन र पार्टी जीवन दुवैमा मेरो दुई दशकभन्दा लामो आबद्धता छ । म कानूनी पृष्ठभूमिबाट आएकी हुँ । सभासद् भएयताको मेरो कार्यशैली सबैले देखेका छन् । यो अवसर पाउनुमा मेरो योग्यता र योगदान दुवैले काम गरेको छ भन्ने लाग्छ ।

समितिको काम कारबाहीलाई प्रभावकारी बनाउने योजना के के छन् ?

संसद्को सफलता वा असफलता मिनी संसद् भनिने संसदीय समितिमा निर्भर गर्दछ । समितिलाई सफल बनाउन सदस्यहरू र संसद् सचिवालयसँगको ‘टीमवर्क’मा जोड दिनेछु । सामाजिक, राजनीतिक जीवनका अनुभवलाई समितिको कार्यसम्पादनमा लगाउने छु ।

समितिका सभापतिले अर्को पार्टीका मन्त्रीले गरेका काममा मात्रै कडिकडाउ गर्छन् भन्ने छ नि ?

पार्टीले चार सभापति पाएकोमा आफ्नो पार्टीका मन्त्री नभएको समिति लिएको छ । शतप्रतिशत निष्पक्ष नभए पनि पार्टीगत आधारमा मन्त्रीमाथि भेदभाव गर्दिनँ । आफ्नै पार्टीका मन्त्रीलाई पनि सभापतिको हैसियतले निर्देशन दिने र छलफलमा बोलाउने ल्याकत ममा छ ।

संसदीय समितिको सभापति र संविधानसभा सदस्यमध्ये कुन भूमिकालाई महत्व दिनुहुन्छ ?

दुवै भूमिका उत्तिकै महत्वपूर्ण छन् । तर सभापति चार वर्षका लागि हो भने संविधान माघ भित्रै बनाइसक्नुपर्नेछ । तसर्थ पहिलो ६ महीना संविधानसभाको भूमिकालाई जोड दिनेछु । समिति र संविधानसभाका कामहरू पनि एकअर्कालाई सघाउ पुर्‍याउने खालकै छन् ।

साप्ताहिक खबरपत्रिका हिमालबाट

प्रतिकृया दिनुहोस