थप समाचारमंगलबार, भाद्र १७, २०७१
आ–आफ्नै अडानमा दलहरुः राज्यपुनर्संरचनामा सहमति भएन
राज्य पुनर्संरचना र शासकीय स्वरुपको विषयमा सहमति जुटाउन १७ साउन विहान बसेको तीन दलको बैठकमा दलहरुले आ–आफ्ना अडान नछोडेपछि बैठकमा कुनै सहमति हुन सकेन ।
संवैधानिक–राजनीतिक संवाद तथा सहमति समितिले संविधानसभा सचिवालय सिंहदरबारमा आयोजना गरेको प्रमुख तीन दलका शीर्ष नेताहरुको बैठकमा राज्य पुनःसंरचना र शासकीय स्वरुप सम्बन्धमा नेताहरुले आ–आफ्ना अडाना प्रस्तुत गरेका थिए ।
संविधान निर्माणको कार्यतालिका अनुसार २२ भदौसम्म सहमति जुटाइसक्नुपर्ने छ।
बैठकमा सहभागी नेपाली कांग्रेस उपसभापति रामचन्द्र पौडेलले बैठकमा राज्यपुनर्संरचनाका बारेमा छलफल भए पनि कुनै सहमतिमा पुग्न नसकिएको जानकारी दिए ।
“सकेसम्म कार्यतालिका बमोजिम २१ गतेसम्ममा मिलाउँछौं, सकिएन भने संविधानसभामा पठाउँछौँ,” उनले भने ।
नेकपा एमालेका उपाध्यक्ष भीमबहादुर रावलले नयाँ संविधानका महत्वपूर्ण दुईवटा अन्तर्वस्तु राज्य पुनःसंरचना र शासकीय स्वरुपका विषयमा तीन प्रमुख दलबीच छलफल गरी एक–एक गरेर टुङ्ग्याउँदै जाने सैद्धान्तिक सहमति भएको बताए ।
उनले भने, “तोकिएकै समयसीमाभित्र रही संविधानका अन्तर्वस्तुमा सहमति गरेर जानुपर्छ भन्नेमा दलहरुबीच एउटै मत छ, त्यसका लागि साझा बिन्दुमा पुग्ने ढङ्गबाट दलहरुबीच छलफल भइरहेको छ ।
एमाओवादी नेता नारायणकाजी श्रेष्ठले दलहरुले पहिलेकै अडान राखेपछि सहमति हुन नसकेको तर, सहमतिका लागि प्रयास भने जारी नै रहने बताए ।