ठगी गर्ने गिरोहका सदस्य प्रहरी हिरासतमा ।

जिल्ला प्रहरी कार्यालय धनकुटाले नक्कली बालालाई सुनको हो भन्दै झुक्याएर सुन पसलमा बेच्ने ४ जनालाई विभिन्न स्थानबाट पक्राउ गरी १९ भदौमा सार्वजनिक गरेको छ ।

ठगी गर्ने गिरोहका मुख्य योजनाकार विराटनगर–३ का सुनिल सोनी, मोरङको इन्द्रपुरदुलारी–६ की इन्दिरा राई, सोलुखुम्बुको सल्लेरी घरभई इटहरी–४ बस्ने मिलन भन्ने नुरु तामाङ र सुनसरी बक्लौरी–३ का युगेन बस्नेतलाई पक्राउ गरी सार्वजनिक गरेको हो ।

उनीहरुले सुनको जस्तो देखिने हातमा लगाउने नक्कली बालालाई असली भन्दै धनकुटा, तेह्रथुम, सुनसरी र मोरङका विभिन्न ३० ओटा सुन पसलमा प्रतिबाला रु ४० हजारका दरले धरौटीमा राखि भागेको जिल्ला प्रहरी कार्यालय धनकुटाका प्रहरी निरीक्षक शेषराज थान्दारले जानकारी दिए ।

पसलेलाई झुक्याउन उनीहरुले आफन्त अस्पतालमा सिकिस्त विरामी भएको र उपचारका लागि तत्काल रकमको आवश्यकता भएको भन्दै बाला ४० हजार धरौटीमा राखेर भाग्ने गरेका थिए ।

उनीहरुले मोरङका १४, सुनसरीका ९, धनकुटाका ६ र तेह्रथुमका १ गरी ३० वठा सुनचाँदी पसलमा ठगी गरेको बयान दिएको प्रहरी निरीक्षक थान्दारले बताए ।

ठगी गर्नेहरुबाट प्रहरीले बरामद गरेका सामान ।

उनीहरुमध्ये इन्दिरा र सुनिललाई १३ भदौमा उनीहरुकै घरबाट, नुरु तामाङ र युगेन बस्नेतलाई काठमाडौं कलंकीबाट १५ भदौमा पक्राउ गरेको थियो ।

प्रहरीले उनीहरुका साथबाट ५ थान मोबाइल, सुनको जस्तो देखिने बुट्टेदार बाला १ थान, को.१७ प.६१४३ नम्बरको यामाहा मोटरसाईकल र रु. ५४ हजार ६०० पनि बरामद गरेको छ ।

धनकुटा सिधुवाबजारका सुनचाँदी व्यावसायीले अपरिचित व्यक्तिहरुले नक्कली सुनको बाला देखाई आफूबाट ४० हजार रुपैयाँमा लगेको भन्ने उजुरी गरेपछि प्रहरीले सुराकीका आधारमा उक्त गिरोहका सबैलाई पक्राउ गरेको हो ।

संतोष रुचाल, धनकुटा

प्रतिकृया दिनुहोस