काँग्रेस नेता कृष्ण सीटौलाका साथ कलाकार संघका उम्मेद्वार

एमाओवादी पक्षबाट नवल खड्का र नेपाली कांगे्रसबाट सविन बाँस्तोला मैदानमा उत्रेका छन् ।

यसका केही पदाधिकारीले संघलाई राजनीतिक संगठन जस्तो बनाएको आरोप लागिरहेका बेला कलाकारहरुको निकै प्रतिष्ठित मानिएको यो संस्थामा अध्यक्षमा माओवादी र कांग्रेसी कलाकारबीच प्रतिष्पर्धा हुँदैछ । अध्यक्षका लागि नवल खड्काले १० असोजमा उम्मेदवारी घोषणा गरेका थिए भने गिरधारी बाँस्तोला (सविन)ले १४ असोजमा पत्रकार सम्मेलन गरी उम्मेदवारी घोषणा गरेका छन् ।

नवलले माओवादी पक्षबाट उम्मेदवारी दिएका हुन् भने सविनले कांग्रेसबाट । नवल समूहबाट अन्य उम्मेदवारमा रामकेशर बोगटी उपाध्यक्षमा र सचिवमा उत्तम केसी छन् भने सविन समूहबाट उपाध्यक्षमा कांग्रेस निकट चेतबहादुर सिंह राजाले उम्मेदवारी घोषणा गरेका छन् । नवलले आफूलाई माओवादी पक्षको भएको स्वीकार नगरे पनि सविनले भने आफू डेमोक्रेट पक्षको भएको बताए । उपाध्यक्ष चेत बहादुरले माओवादी पक्ष हावी भएकाले डेमोक्रेटको पक्षबाट उम्मेदवारी दिएको बताए ।

कार्यक्रममा कांग्रेसको भगिनी संस्था सांस्कृतिक संघका अध्यक्ष तीर्थ थापा अध्यक्ष प्रमुख अथितिको रुपमा बोलाइएको थियो तर उनी उपस्थित भएनन् । संघका वर्तमान कार्यसमितिका उपाध्यक्ष मोहन निरौलाले विशुद्ध कलाकारको पेशागत संगठनमा कलाकार कलाकारबीच प्रतिष्पर्धा नभई पार्टीका हिसाबमा प्रतिष्पर्धा हुनु दुखद भएको बताए । उनले भने ‘कलाकार संघमा भएको यस्तो लडाईंले भोलि पक्कै राम्रो हुन्छ जस्तो लाग्दैन ।’

प्रतिकृया दिनुहोस