१९–२४ भदौसम्म काठमाडौंमा भइरहेको रसायनशास्त्रका वैज्ञानिकहरूको अन्तर्राष्ट्रिय सम्मेलनको आयोजक ‘नेपाल पोलिमर इन्स्टिच्युट’ का अध्यक्ष डा. रामेश्वर अधिकारीसँग गरिएको कुराकानीः

यो सम्मेलनको उद्देश्य के हो ?

यसपटक हामीले दुई वटा कार्यक्रम सँगै गरेका छौं । ‘काठमाडौं अटम स्कूल अन केमेष्ट्री एण्ड टेक्नोलोजिज’ १९–२१ भदौमा र ‘सेकेन्ड इन्टरनेशनल कन्फ्रेन्स अन काठमाडौं सिम्पोजिया अन एड्भान्स मटेरियल’ २२–२५ भदौमा । यी कार्यक्रममा विभिन्न देशका वैज्ञानिक सहभागी हुनुहुन्छ ।

रसायनशास्त्र र त्यससँग सम्बन्धित प्रविधिहरूको नवीनतम अनुसन्धान, विकास र उपयोगबारे विश्वभरका वैज्ञानिकहरूको सम्मेलन गरेर नेपाली विद्यार्थी र युवा वैज्ञानिकहरूको पहुँच विश्वका ख्यातिप्राप्त वैज्ञानिकहरूको प्रयोगशालासम्म पुर्‍याउने सम्मेलनको उद्देश्य हो ।

सम्मेलनमा कति वैज्ञानिकको सहभागिता रहनेछ ?

नेपालसहित भारत, अमेरिका, जर्मनी, फ्रान्स, जापान, कोरिया, दक्षिण अफ्रिका, बंगलादेश, पाकिस्तान, बेलायत लगायत ११ देशका १५० वैज्ञानिक सहभागी छन् ।

यसबाट नेपाललाई के फाइदा हुनेछ ?

नेपालका युवा वैज्ञानिक र विज्ञानका विद्यार्थीको सम्पर्क विश्वभरका विख्यात वैज्ञानिकहरूसँग हुन्छ । भविष्यमा नेपालमै बसेर अनुसन्धान गर्दा पनि अन्य देशका वैज्ञानिकहरूसँगको सम्पर्कले सजिलो पार्छ ।

विज्ञान–प्रविधिको विकासका लागि राज्यले कस्तो नीति अवलम्बन गर्नुपर्ला ?

विज्ञान–प्रविधिको विकास विना देशको विकास हुँदैन । त्यसैले सरकार र योजना आयोगले विज्ञान–प्रविधिलाई प्राथमिकतामा राखेर बजेट विनियोजन गर्नुपर्छ । युवा वैज्ञानिकलाई स्वदेशमै अनुसन्धान गर्ने वातावरण बनाउनुपर्छ ।

वैज्ञानिक खोज अनुसन्धानलाई सर्वसाधारणको हितमा कसरी प्रयोग गर्न सकिएला ?

हरेक अनुसन्धानका उपलब्धि सर्वसाधारणको हितका लागि नै हुने हो । जडीबुटी, कृषि, ऊर्जा लगायत क्षेत्रको विकासका लागि अनुसन्धान गर्न यसले थप मद्दत गर्नेछ ।

साप्ताहिक खबरपत्रिका हिमालबाट

प्रतिकृया दिनुहोस