रमझममंगलबार, भाद्र २४, २०७१
मित्रता र प्रेमको उत्सव
-अनुशील
साथीहरुबीचको मित्रता, पारिवारिक सम्बन्ध र तन्नेरी चाहनाहरुको ‘कलरफुल स्केच’ का रुपमा दर्शकमाझ आएको छ, फिल्म उत्सव। प्रोमो र पोस्टरहरुबाटै युवा ध्यान खिच्न सफल यो फिल्म उमा, दासढुंगा, मेरो लभस्टोरी र आचार्य सिनेमाका स्क्रिप्ट लेखक र सहायक निर्देशक कुमार भट्टराईको डेब्यु फिल्म हो। उनी आशालाग्दो निर्देशकका रुपमा देखा परेका छन्।
मित्रता र पारिवारिक जीवनको उतारचढावमा केन्द्रित यो फिल्म हेर्दा दर्शकलाई आफ्नो कलेज लाइफ र मन मिल्ने साथीहरुसँग विताएका पलहरुको याद आउँछ। राम्रो लोकेशनमा पुरुषोत्तम प्रधानको सुन्दर सिनेमाटोग्राफी, सनुप पौडेल र सुरेश राईको मीठो संगीतले फिल्मलाई आकर्षक बनाएको छ।
कतिपय ठाउँमा अनावश्यक तन्किएको आभास हुने फिल्मको संवाद कसिलो छ। पाँच मित्रका रुपमा सौगात मल्ल, मेनुका प्रधान, गौरव पहारी, प्रकृति श्रेष्ठ र सञ्जोग कोइराला जमेका छन्। फिल्म मुखौटा मा खस्केका सौगात यसमा जमेका छन्।
मेकिङको हिसाबले राम्रो यो फिल्मको कथा–पटकथा कहीं म्युजिकल हिन्दी फिल्म रक अन को जस्तो त कतै दाजुभाइ र सौतेनी आमाको प्रसङ्ग रहेको उडान र मासुम को समायोजन जस्तो लाग्छ।
जीवनका राम्रा पक्षहरु देखाएर सकारात्मक सन्देश दिन खोजेको फिल्मले समयक्रमसँगै बदलिने मित्रताको रुप चित्रणसँगै युवामाझको संगीत आकर्षण र अस्वस्थ प्रतिस्पर्धालाई प्रस्तुत गरेको छ। शेखर कोइरालाले निर्माण गरेको उत्सव हेरेपछि पैसा खेर गए जस्तो लाग्दैन।
साप्ताहिक खबरपत्रिका हिमालबाट