थप समाचारशुक्रबार, आश्विन ३, २०७१
‘इलेभेन जिनपिङ’ पढ्दा समाचार वाचिकाको जागिर गयो
विदेशी नेताहरुको नाम उच्चारण गर्नु समाचार पढ्नेहरुका लागि विश्वभर नै टाउको दुखाइको विषय हुने गर्छ । अझ उक्त देशको भाषा आफूले नबुझ्ने भए त झनै गाह्रो ।
भारतको सरकारी टेलिभिजन दुरदर्शनकी समाचार वाचिकाले २ असोज अबेर रातिको समाचारमा भारत भ्रमणमा रहेका चिनियाँ राष्ट्रपतिको नाम सी जिनपिङलाई ‘इलेभेन जिनपिङ’ पढ्न पुगिन् । अंग्रेजीमा लेखिएको XI (सी) लाई उनले रोमन अंक एघार (11) ठानेर त्यसैगरी पढेकी थिइन् ।
भारत भ्रमणमा रहेका चिनियाँ राष्ट्रपति ३ असोजमा स्वदेश फर्कनुअघि नै समाचार वाचिकालाई अवकास दिइसकेको दुरदर्शनका प्रमुख कार्यकारी जवाहर सरकारलाई उद्धृत गर्दै भारतीय सञ्चारमाध्यमले उल्लेख गरेका छन् ।
सन् १९९० अघि भारतमा एकछत्र राज गरेको सरकारी टेलिभिजन दुरदर्शनले त्यसपछि निजी टेलिभिजनसँग प्रतिस्पर्धा गर्ननसक्दा दर्शक गुमाउँदै गएको छ ।
आफ्नो ६४ औं जन्मदिन मनाउन चिनियाँ राष्ट्रपतिलाई गृहनगर अहमदावादमा रातो कार्पेट ओछ्याएका भारतीय प्रधानमन्त्री नरेन्द्र मोदीलाई समाचार वाचिकाको गल्तीले निकै अप्ठायारोमा पारेको थियो ।
एएफपी