आयोजक श्रीलंकालाई ३६ रनले पराजित गरेर वेष्ट इन्डिजले उपाधि हात पारेको हो । वेष्ट इन्डिजले प्रस्तुत गरेको १३७ रनको लक्ष्य भेट्टाउन नसक्दा यसपटक पनि श्रीलंकाको विजेता बन्ने सपना पुरा हुन सकेन । श्रीलंका २००९ मा फाइनलमा पाकिस्तानसँग पराजित भएको थियो ।

टि–ट्वान्टि: कसले मार्ला बाजी ?

वेस्ट इन्डिजका ब्याट्स्म्यानहरुले श्रीलंकाली स्पिन आक्रमणलाई कस्तो जवाफ दिन्छन्, त्यसमा म्याचको नतिजा निर्भर हुनेछ ।

आईसीसी वर्ल्ड टी-ट्वेन्टीको फाइनल खेलमा आयोजक श्रीलंका र वेस्ट इन्डिज भिड्दैछन् । कोलम्बोको प्रेमदाशा रङ्गशालामा खेलिने सो खेल नेपाली समय अनुसार बेलुकि ७.१५ बजे शुरु हुँदैछ । घरेलु टोलीले समुह चरणमा दक्षिण अफ्रिकाविरुद्ध सात ओभरमा छोट्ट्याइएको खेलमा भोगेको पराजय बाहेक बाँकी सबै खेलमा उत्कृष्ट प्रदर्शन गर्दै जित हात पारेको छ । न्युजीलन्डविरुद्ध १७४ रनको लक्ष्य पछ्याँउने क्रममा तिलक रत्ने दिल्शानको ब्याटिङ्, इङ्लन्डविरुद्ध लसिथ मलिङ्गाको घातक बलिङ्ग्, सेमिफाइनलमा कठिन पिचमा महेला जयवर्देनाको कुशल ब्याटिङ्ग र १३९ रनको लक्ष्य जोगाउन बलरहरुले खेलेको भूमिकालगायतका ब्यक्तिगत प्रदर्शनको मद्दतले श्रीलंकाले फाइनलको यात्रा तय गर्न सफल भएको छ ।

उता वेस्ट इन्डिजको ब्याटिङ यस प्रतियोगितामा बलरहरुको लागि टाउको दुखाइको विषय बनेको छ । प्रतियोगितामा दोस्रो सर्वाधिक रन (२१९ ) बनाएका क्रिस गेल्,  जोन्सन चार्ल्स, मार्लन सामुएल्स्, काइरन पोलार्ड र ड्वेन ब्राभो जस्ता खेलाडीहरुले ठुलो शट हान्ने क्षमता राख्दछन् । ओपनर मध्ये कुनै एकले कम्तिमा १२ ओभर सम्म क्रिजमा रहन सफल रहेमा श्रीलंकाको लागि समय कठिन बन्नेछ ।

बलिङ्ग आक्रमणलाई हेर्ने हो भने श्रीलंकाको बलिङ्ग प्रतियोगितामै उत्कृष्ट रहेको कुरामा दुई मत नहोला । १२.२७ को औसत र ६.७५ को इकोनोमी रेटले ११ विकेट लिएका अजन्था मेन्डिस् र आठ विकेट हात पारेका मालिङ्गाको धारिलो बलिङ्गको जवाफ दिन वेस्ट इन्डिजलाई हम्मे हम्मे पर्न सक्छ । श्रीलंकासँग रङ्गना हेराथ र जीवन मेन्डिसका रुपमा अन्य दुई स्पिनर पनि छन् । परम्परागत रुपमा स्पिनलाई राम्ररी खेल्न नसक्ने टोली भएको कारण पनि फाइनलमा वेस्ट इन्डिजले सुझबुझ पुर्वक ब्याटिङ्ग गर्नुको विकल्प छैन । यी दुई टोली बीच भएका अघिल्ला दुबै भिडन्त (वार्म-अप खेल र सुपर एट ) मा श्रीलंकाले ९ विकेटको जित दर्ता गर्दा वेस्ट इन्डिजका ब्याट्स्म्यानहरुले स्पिनलाई राम्रो जवाफ दिन सकेका थिएनन् । दुबै खेलमा ८-८ ओभरको स्पिन आक्रमण विरुद्ध उनीहरुले ४० र ४३ मात्र बनाउन सकेका थिए ।

उता श्रीलंकाका उपल्लो पङ्क्तिका तीन ब्याट्सम्यान राम्रो लयमा देखिन्छन् । २०१ रन बनाएका कप्तान जयवर्देना, १७९ रन जोडेका दिल्शान तथा पुर्व कप्तान कुमार सङ्गाकाराको ब्याटिङ वरिपरी नै उसको को सफलता घुमेको छ । यो प्रतियोगितामा श्रीलंकाले लिएको ४१ विकेटका विरुद्ध वेस्ट इन्डिजले मात्र २८ विकेट लिन सफल भएको तथ्यले पनि फाइनलमा घरेलु टोलीलाई त्यति गार्हो नपर्ने अड्कल काट्न सकिन्छ । रवि राम्पोल र सुनिल नरैनको बलिङ्ग कसिलो भएता पनि सेमीफाइनलमा पाकिस्तानको जस्तो धारिलो बलिङ्ग नभएकोले आयोजक केहि हावी हुन सक्नेछन् ।

समुह चरणमा रद्द भएको आयर्ल्यान्ड विरुद्धको खेल बाहेक वेस्ट इन्डिजले सबै खेलमा पहिले ब्याटिङ्ग गरेको छ । लक्ष्य पछ्याउने अनुभव नभएका कारण श्रीलंकाले पहिले ब्यटिङ्ग गरेको खन्डमा उसलाई फाइनलमा केहि दवाब नहोला भन्न सकिन्न ।

दुबै टोलीले ठुला प्रतियोगिता जित्न नसकेको लामो समय बितिसकेको छ । १९९६ मा विश्वकप जितेको श्रीलंकाले त्यस पछिका दुई विश्वकप र एक टी-ट्वेन्टी विश्वकपमा उपविजेतामै चित्त बुझाउन बाध्य भएको थियो भने २००२ को च्याम्पियन्स ट्रफीमा भारतसँग ट्रफी बाँडेको थियो ।

उता वेस्ट इन्डिजले पनि २००४ को च्याम्पियन्स ट्रफी जित्नु बाहेक ठुलो उपलब्धि हासिल गर्न सकेको छैन । एक दिवसिय र टेस्टमा फितलो प्रदर्शन भएपनि टी-ट्वेन्टीमा उसको प्रदर्शन उत्कृष्ट छ र निरन्तर रुपमा नयाँ प्रतिभा जन्माउँदै आएको छ । १९७९ पछि पहिलो विश्वकप उपाधि जित्ने मौका खेर जान दिने पक्ष्यमा कप्तान ड्यारेन सामीको टोली छैन । गेल र चारल्सले राम्रो सुरुवात दिन सकेको खन्डमा खेलमा श्रीलंकाको लागि अप्ठ्यारो स्थिति हुनेछ ।

आयोजक श्रीलंका पनि जयवर्देनाको कुशल नेतृत्वमा केहि महिना यता राम्रो खेलिरहेको छ । युवा र अनुभवी खेलाडीहरुको राम्रो सम्मिश्रन रहेको टोलीको लागि उपाधि जित्ने र भविष्यको लागि राम्रो आधार खडा गर्ने सुनौलो मौकाको रुपमा यो फाइनल उसको सामु छ ।

वेस्ट इन्डिजको तुलनामा बढी ‘कन्सिस्टेन्ट’ र सन्तुलित देखिएको घरेलु टोलीको जित्ने सम्भावना अलिकति बढि छ । उसका लागि विशाल समर्थन हुने नै छ तर घरेलु समर्थनको अगाडि राम्रो प्रदर्शन गर्ने दवाब पनि उत्तिकै छ ।

फाइनल प्रतिस्पर्धा र त्यस माथि पनि टी-ट्वेन्टी जस्तो फर्म्याट भएका कारण नतिजा कुनै पनि समय कुनै पनि टोलीको पक्ष्यमा उल्टिन सक्दछ । नतिजा जे भए पनि फाइनल खेल रोमन्चक हुनेमा शङ्का छैन ।

प्रतिकृया दिनुहोस