थप समाचारमंगलबार, कार्तिक ११, २०७१
‘सेल्फी खिच्दा जुम्रा फैलिन्छ’
रुसको सरकारी एजेन्सी रोसपोत्रेब्नादजरको क्षेत्रीय विभाग कुर्स्कका अनुसार मानिसहरुमा बढ्दो सेल्फी (आफैंले खिचेको आफ्नै एकल वा सामूहिक तस्वीर ) को प्रचलनले जुम्राको समस्या बढिरहेको छ ।
यो संस्थाले नागरिकलाई स्वस्थ्य जीवनका बारेमा सल्लाह दिने गर्छ ।
संस्थाका अनुसार एक–अर्कासँग टाँसिएर सेल्फी खिच्दा जुम्रा एउटाको टाउको बाट अर्काको टाउकोमा सर्ने सम्भावना अधिक हुन्छ ।
संस्थाले चेतावनी दिंदै गर्दा टाउकोमा जुम्रा भएका बालबालिकालाई विद्यालय जानबाट रोक लगाइएको पनि स्मरण गराएको छ ।
विवादित सल्लाह
विश्वमै युवाहरुमा सेल्फी खिच्ने चलन बढ्दो छ ।
रोसपोत्रेब्नादज़रका यस्तै अन्य सल्लाहमा पहिले पनि विवाद आएका छन् । संस्थाका पूर्व प्रमुख जेन्नैडी ओनिश्चेंकोले एक पटक कागलाई बर्डफ्लू फैलाउने पखेटा भएका ब्वाँसो भन्दै मार्नु पर्ने सल्लाह दिएका थिए ।
उनले रुससँग राजनीतिक सम्बन्ध राम्रो नभएका देशका पेय पदार्थमाथि रोक समेत लगाएका थिए ।
अहिले जुम्राको विषयमा संस्थाले दिएको सल्लाह रुसी सामाजिक सञ्जालमा मजाकको विषय बनेको छ ।
लेन्टा वेबसाइटमा जर्ज क्लोचकोवले टिप्पणी गरेका छन्, “के उनी अधिकांश रुसी युवाहरुका टाउकामा जुम्रा छ भन्ने ठान्छन ?”