१५ कात्तिक विहान सवा २ बजे काठमाण्डौबाट विराटनगर जाँदै गरेको ना ४ ख ५४४८ नम्बरको शुभश्री ट्राभल्स र इलामबाट काठमाण्डौ जाँदै गरेको ना ५ ख ४८४१ नम्बरको यात्रुबाहक बस एक-आपसमा ठोक्किंदा १० जनाको मृत्यु भएको छ भने ३१ जना घाइते भएका छन् । मृत्यु हुनेमा एक जना रुसी नागरिक पनि  छन् ।

दुर्घटनामा शुभश्री ट्राभल्समा यात्रा गरिरहेकी इटहरीकी शान्ता लुइटेलको घटना स्थलमै ज्यान गएको जिल्ला प्रहरी कार्यालय मकवानपुरले जनाएको छ । त्यस्तै मेट्रो ट्राभल्समा यात्रा गरिरहेका अन्य ७ जनाको अस्पाल लैजाने क्रममा मृत्यु भएको मकवानपुर प्रहरीले जनाएको छ ।

प्रहरीका अनुसार मृत्यु हुनेमा रसियन महिला २६ वर्षीया डारिया मचकोवा, इलामका रोशन भट्टराई, मिलन अधिकारी, सुजाता काफ्ले, रक्षा श्रेष्ठ, र थर नखुलेकी आस्था रहेको  जिल्ला प्रहरी कार्यालय मकवानपुरका प्रवक्ता दिपक थापाले जानकारी दिए ।

त्यस्तै  उपचारको क्रममा इलामकै प्रविण आचार्यको हेटौंडा अस्पतालमा र प्रविण दाहालको भरतपुर अस्पतालमा उपचारको क्रममा मृत्यु भएको छ । दुर्घटनामा परी अरु ३१ जना घाइते भएका छन् । तीब्र गतिका कारण दुर्घटना भएको प्रहरीको भनाइ छ ।

दशैंयता यो पाँचै ठूलो सवारी दुर्घटना हो ।

गत ९ कात्तिकमा ओखलढुंगामा जीप दुर्घटना हुँदा ११ को मृत्यु भएको थियो भने ७ कात्तिकमा काठमाडौंबाट रसुवा जाँदै गरेको वस नुवाकोटमा दुर्घटना हुँदा  १४ को मृत्यु भएको थियो ।

त्यसैगरी १ कात्तिकमा मकवानपुरमा ६ जना र ४ कात्तिकमा चितवनमा ६ जनाको सवारी दुर्घटनामा मृत्यु भएको थियो ।

यसबीचको सबै भन्दा ठूलो दुर्घटना डोटीमा २० असोजमा बस दुर्घटना हुँदा ३५ जनाको मृत्यु भएको थियो ।

सुरजकुमार भुजेल, मकवानपुर

प्रतिकृया दिनुहोस