नेपाल धितोपत्र बोर्डले थापाथलीस्थित सिडिएस क्लियरिङ लिमिटेडलाई सेयर धनीको सुरक्षा तथा सहजताका लागि डिम्याट प्रणाली विकास गर्न अनुमति दिएपछि उक्त कार्य गत २० असोजदेखि शुरु भएको हो । भौतिकरूपमा भएका सेयरलाई डिम्याट गर्ने प्रणालीलाई नै केन्द्रीय निक्षेप प्रणाली भनिन्छ ।

नेपाल स्टक एक्सचेन्जको पूर्ण स्वामित्वमा सञ्चालित क्लियरिङ लिमिटेडले २७ कात्तिकसम्म (क) वर्गका वाणिज्य बैंकसहित ९ लाख १४ हजार ९७१ सेयर सङ्ख्या अभिलेख गरेको जनाएको छ ।

विभिन्न वित्तीय संस्था, होटल, जलविद्युत् कम्पनी गरी ६७ कम्पनीले आफ्ना सेयर धनीको डिम्याट खाता खोल्न सम्झौता गरेका छन् । त्यसैगरी साल्ट ट्रेडिङ कर्पोरेसन, नेपाल टेलिकमलगायत ६१ कम्पनी पाइप लाइनमा छन् ।

डिम्याट प्राणालीमा गएपछि सेयर धनी तथा लगानीकर्ताले अलगअलग कम्पनीमा गरेका लगानीको सेयर नहराउने, नच्यातिने र सुरक्षित हुने गर्दछ ।

विभिन्न कम्पनीका सेयरलाई नामसारी गर्नुपर्दा पनि सम्बन्धित कम्पनीमा धाउन नपर्ने र तीन दिनभित्रमा नामसारी हुने व्यवस्था मिलाइएको छ ।

सेयर धनी तथा लगानीकर्ताले धितो बन्धकी राख्दा, त्यसलाई रोक्का तथा फुकुवा गर्न पर्दा सम्बन्धित बैंकमा खोलिएको डिम्याट खातामार्फत कार्य गर्न सकिने छ । सम्बन्धित कम्पनीले सेयर धनीलाई उपलब्ध गराउने नगद लाभांश तथा बोनस सेयर लिनका लागि सेयर धनी फरकफरक कम्पनीमा धाइरहनुपर्ने अवस्थाको अन्त्य भई डिम्याट खातामार्फत कार्य हुनेछ ।

२ कात्तिकदेखि वाणिज्य बैंक बाहेकका अन्य कम्पनी तथा समूहका सेयर धनीलाई अभिलेख गर्न शुरु गरिएको संस्थाकी कर्मचारी सविना पुजारीले जानकारी दिइन् ।

सिडिएस क्लियरिङ लिमिटेडले आउँदो माघ २ गतेदेखि वाणिज्य बैंकको सेयर किन्न तथा बेच्न डिम्याट प्रणालीबाट गर्नुपर्ने, १ फागुनदेखि (ख) वर्गका वित्तीय संस्था र बिमा कम्पनीलाई सोही प्रणालीबाट कारोबार गर्नका लागि अनिवार्य व्यवस्थाको गृहकार्य गरेको छ ।

त्यस्तै २ वैशाख २०७२ देखि अन्य बाँकी कम्पनी तथा समूहको सेयर डिम्याट प्रणालीबाट कारोबार गर्न गराउनका लागि तयारी गरेको पुजारीले बताइन् ।

प्रतिकृया दिनुहोस