थप समाचारबुधबार, मंसिर ३, २०७१
लुक्लामा ५०० पर्यटक रोकिए
सोलुखुम्बुको तेन्जिङ हिलारी विमानस्थल लुक्लामा चार दिनदेखि मौसम खराबी हुँदा ५०० भन्दा बढी पर्यटक रोकिएका छन् । बिहान केहिबेर मौसममा सुधार भए पनि नियमित उडान हुन नसक्दा पर्यटक रोकिएका हुन् ।
चार दिनदेखि नियमित उडान हुन नसकेको तारा एयरका लुक्ला विमानस्थल इन्चार्ज फुनुरु शेर्पाले जानकारी दिए । २ मंसीरमा तय भएको ५० उडान मौसममा खराबी आएपछि रोकिएको उनको भनाइ छ ।
आधाभन्दा बढी उडान हुन नसक्दा स्वदेशी तथा विदेशी पर्यटक मारमा परेका छन् । खुम्बु क्षेत्र घुम्न आएका पर्यटक फर्कने सिजन भएकाले अहिले माथिल्लो क्षेत्र घुमेर राजधानी फर्कनका लागि आएका पर्यटकको लुक्लामा घुइँचो लागेको छ ।
३ मंसीरमा पनि मौसम सफा हुन नसकेकाले उडान नहुने एयरलाइन्स व्यवसायीले बताएका छन् ।
रासस