थप समाचारबिहीबार, मंसिर ४, २०७१
भारतः बाबा रामपाल पक्राउ
हत्याको आरोपमा अदालतले उपस्थित हुन आदेश दिएका भारतको मरिहयाणास्थित सतलोक आश्रम सञ्चालन गर्ने बाबा रामपाललाई प्रहरीले पक्राउ गरेको छ ।
प्रहरीका अनुसार आश्रमबाट ४ महिला र एक बालकको शव समेत बरामद भएको छ । प्रहरी र बाबाका अनुयायीबीचको झडपमा उनीहरुको मृत्यु भएको अनुमान प्रहरीको छ ।
पंजाब हरियाणा हाईकोर्टले केही दिनअघि रामपालविरुद्ध वारेन्ट जारी गरे पनि उनका समर्थकहरुले विरोध गरिरहेका थिए भने रामपाल पनि अदालतको सम्पर्कमा गएनन् ।
प्रहरी पक्राउ गर्न जाँदा उनको आश्रममा हजारौंको संख्यामा अनुयायीहरु रहेको भारतीय सञ्चारमाध्यमहरुले जनाएका छन् । अनुयायीहरुको विरोधका बीच प्रहरीले उनलाई पक्राउ गर्न सकिरहेको थिएन ।
आश्रमभित्रका अन्य कैयौं भवनभित्र अहिलेसम्म पनि प्रहरी पुग्न सकिरहेको छैन । ति भवनहरुमा रामपालका सशस्त्र अनुयायीहरु रहेको प्रहरीको अनुमान छ ।
प्रहरीलाई त्यहाँ रहेका अनुयायीहरुलाई बाहिर निकाल्न मात्रै दुई दिन लागेको थियो । आश्रमको पर्खाल निकै अग्लो भएको र भित्रबाट अनुयायीहरुले समेत प्रहार गरिरहेकाले भित्र पुग्न समय लागेको प्रहरीको भनाई छ ।
बाबा रामपाल बन्नु अघि उनी हरियाणा सरकारको सिंचाई विभागमा इञ्जिनियर थिए ।
नोकरीका क्रममा नै सत्संग शुरु गरेका उनी पछि संत रामपाल बने । उनीमाथि हत्यालगायत विभिन्न आरोप लागेका छन् ।