-अनुशील

राजधानी होस् या देशका अरु शहर–बजार— परिवार, समाज र राज्यले बेवास्ता गरेको एउटा समूह छ । फूटपाथ, फोहोरको थुप्रो र कवाडीहरुमा भोक विरुद्व संघर्ष गरिरहेका भेटिने त्यही समूहको कथा भन्छ, फिल्म ‘श्री ५ अम्बरे’ ले ।

बालकहरु पेटका लागि संघर्ष गर्दै अपराधको दलदलमा फस्छन् भने बालिकाहरु यौन हिंसाको शिकार हुँदै बार डान्सर र ‘कल गर्ल’ बन्नुपर्ने बाध्यता स्वीकार्छन् । दिनको उज्यालो भीडमा हराउने उनीहरुमध्ये कतिले मध्यरातमा आफूलाई शहरको राजा ठान्छन् । हाम्रो शहरिया समाजले उनीहरुलाई कसरी हेर्छ ? नयाँ पुस्ताले उनीहरुलाई कसरी बुझेको छ ? निर्देशक दीपा बस्नेतले फिल्ममा उत्तर चाहेकी छन् ।

फिल्ममा समाजले ‘खाते’ भनेर उपेक्षा गरेको प्रमुख पात्र छ– अम्बरे (सौगात मल्ल) जसलाई साथीहरुले ‘श्री ५ अम्बरे’ भन्छन् । ‘श्री ५ अम्बरे’ को रुपमा सौगात र सडकमै हुर्किएर ‘कल गर्ल’ बनेकी काली (केकी अधिकारी) सँग अन्य कलाकारहरु विक्रम सिंह, सृजना अधिकारी लगायतको अभिनय उम्दा छ । फिल्मलाई यथार्थपरक बनाउन अभिमन्यु निरवीसँगै निर्देशक दीपा र जीवनसाथी बस्नेतले सात महीना राजधानीका विभिन्न स्थानमा रिसर्च गरेका थिए । अभिमन्युको पटकथा–संवादले फिल्मलाई चम्काएको छ । जीवनसाथी फिल्मस्को ‘श्री ५ अम्बरे’ को छायाकार गणेश श्रेष्ठ र सम्पादक चन्दन दत्त हुन् भने बसन्त सापकोटा, कालीप्रसाद बास्कोटा, बाबु बोगटी, यम बुद्ध संगीतकार ।

भविष्य खोज्दै शहर छिरेका युवाहरुको कथामा ‘अन्तराल’ फिल्म बनाएर राष्ट्रिय चलचित्र अवार्ड जितेकी निर्देशक दीपाको ‘श्री ५ अम्बरे’ ले एउटा सामाजिक विषयलाई मन छुने गरी उठाएको छ । फिल्म हेरिरहँदा दर्शकलाई हल भित्र नभएर वाग्मती वा विष्णुमती किनारको फोहोरको थुप्रोमा भएजस्तो लाग्छ । सडक बालबालिकामा केन्द्रित भएकाले फिल्ममा ठमेल र बसन्तपुरका सडकका दृश्यहरु पनि धेरै छन् । बारका आइटम गीत, सडकका छाडा बोली, फाइट लगायत सबै थोक भएकोले ‘श्री ५ अम्बरे’ मन छुनेसँगै ‘मसालेदार’ पनि बनेको छ ।

साप्ताहिक खबरपत्रिका हिमालबाट

प्रतिकृया दिनुहोस