नेपालमा माग अनुसार दूधको आपूर्तिका लागि भारतबाट १० हजार उन्नत जातका गाई ल्याउन प्राविधिक कठिनाइ भएपछि सरकारले चीनबाट उक्त संख्यामा गाई ल्याउने प्रक्रिया अघि बढाएको छ ।

चीनका कृषि सचिव वेइ चावन नेतृत्वको सात सदस्यीय प्रतिनिधिमण्डलसँग १५ मंसीरमा पहिलोचरणको वार्ता गरेपछि कृषि विकासमन्त्री हरिप्रसाद पराजुलीले चीनसँग कृषि, पशुपालनलगायत पारस्परिक लाभका क्षेत्रमा सहकार्य गर्न सरकार प्रतिबद्ध रहेको बताए ।

चिनियाँ प्रतिनिधिमण्डलसँगको वार्ता सकारात्मक रहेको जानकारी दिँदै उनले चीनबाट १० हजार गाई ल्याउने प्रक्रिया जारी रहेको जानकारी दिए । “यहाँस्थित राजदूतावासमार्फत चीनको केन्द्रीय सरकारसँग कुरा गरी गाई ल्याउने प्रयासमा छौं ।”

चीनको सिचुवान प्रान्तबाट गाई ल्याउने प्रक्रिया अघि बढाइएको जानकारी दिँदै उनले वार्तामा उच्च जातका रेशम, धान र उखुका बीउ प्रदान गर्न चिनियाँ पक्ष सकारात्मक रहेको बताए ।

चीनबाट नेपालका लागि अर्थपूर्ण एवम् प्रतिफल प्रदान गर्ने कृषि परियोजनामा सहयोग जुटाउन आफू लागिपरेको मन्त्री पराजुलीको दाबी थियो ।
रासस

प्रतिकृया दिनुहोस