–बच्चु विक, महेन्द्रनगर

२०६१ मंसीर पहिलो साता सुदूरपश्चिमको बैतडीमा धार्मिक जात्रामा विवाद उत्पन्न हुँदा कथित उच्च जातका केही व्यक्तिले ‘काला, मैला दलित जतिलाई कुट्ने’ उर्दी जारी गरेका थिए । यो मंसीरको पहिलो साता त्यही दलित समुदायकी सरस्वती विक ‘मिस सुदूरपश्चिमाञ्चल–२०१४’ बनिन् । “१० वर्षमा सुदूरपश्चिम कहाँदेखि कहाँ पुगिसक्यो”, २० वर्षीया सरस्वती भन्छिन् । हुन पनि, एउटा संघर्षशील विश्वकर्मा युवतीले मिस सुदूरपश्चिमाञ्चलको ताज पहिरिनु आफैंमा सुदूरपश्चिम परिवर्तनको अकाट्य प्रमाण हो ।

अहिले कैलालीको धनगढी नगरपालिका–८ मा बसेकी सरस्वती ७ मंसीरको प्रतियोगिताको अन्तिम चरणमा १७ प्रतिस्पर्धीलाई उछिन्दै मिस सुदूरपश्चिमाञ्चल भइन् । कैलाली बहुमुखी क्याम्पसमा स्नातक दोस्रो वर्षकी विद्यार्थी र धनगढी एफएममा कार्यक्रम प्रस्तोता रहेकी उनी कैलालीको मालाखेती–१ बल्मीमा १२ कक्षा सकेर धनगढी आएकी थिइन् ।

एसएलसी उत्तीर्ण नगर्दासम्म उनी लुगा सिलाउन आमालाई सघाउँथिन् । बुवा चक्रले भारतको महाराष्ट्रस्थित पानीहिलमा ‘टेलरिङ शप’ खोलेर आमा कलशालाई पनि उतै लगेपछि जेठी छोरी सरस्वतीले घरमा दुई जना भाइ रेखदेखको जिम्मेवारी पनि सम्हालिन् । दुःख झेल्दै, बुझ्दै आएकी सरस्वतीलाई आफ्नो सामाजिक परिवेश राम्रोसँग थाहा छ । “आफूलाई कमजोर ठान्दिनँ”, उनी भन्छिन्, “अब त धेरै परिवर्तन पनि भइसक्यो ।”

उनी गीतहरु लेख्छिन् र गायनमा पनि दक्खल राख्छिन् । मिस सुदूरपश्चिमाञ्चलको उपाधिसँगै मोडलिङतिरको यात्रा पनि शुरु गरेकी सरस्वती अब समय पाएसम्म गायनलाई खार्ने बताउँछिन् ।

साप्ताहिक खबरपत्रिका हिमालबाट

प्रतिकृया दिनुहोस