दमक आसपासका क्षेत्रमा मोटरसाइकल चोरी गर्दै आएका तीन जनालाई पक्राउ गरेर प्रहरीले २३ मंसीरमा सार्वजनिक गरेको छ । पक्राउ पर्नेमा झापा सतासीधामका सन्देश लिम्बू, दमक–१६ का दिवस लामा र दमक–१५ का मिलन दाहाल छन् ।

दमक–११ बाट मे ४ प ९८१३ नम्बरको मोटरसाइकल १५ मंसीरमा चोरेर सन्देश फरार थिए । उनलाई चोरीको मोटरसाइकलको नम्बर परिवर्तन गरेर कुदाइरहेको अवस्थामा झिलझिलेबाट पक्राउ गरेको दमक प्रहरी प्रमुख प्रहरी नायव उपरीक्षक रविकुमार पौडेलले जानकारी दिए ।

यस्तै, १९ मंसीर राति दमक–१६ स्थित भट्टराई कुल वंश प्रतिष्ठानको मन्दिर परिसरबाट मे ५ प ८४२७ नम्बरको मोटरसाइकल चोरेर भागेका दिवसलाई प्रहरीले दमकको खनाल मार्केटस्थित भानु फोटो स्टुडियो अगाडीबाट पक्राउ गरेको थियो ।

मिलन भने चुलाचुली–५ का प्रकाश अधिकारीको मे ४ प ९८३४ नम्बरको मोटरसाइकल चोरी गरेर फरार थिए । उनलाई मोटरसाइकल भारत लैजान लाग्दा सुनसरीको सोनापुरबाट पक्राउ गरेको प्रहरीले जनाएको छ ।

पक्राउ तीनैजना माथि चोरी मुद्धा दर्ता गरिएको र अदालतबाट म्याद थप समेत लिइ थप अनुसन्धान अघि बढाइएको प्रहरी उपरीक्षक पौडेलले बताए ।

गोपाल गडतौला, झापा

प्रतिकृया दिनुहोस