थप समाचारसोमबार, मंसिर २९, २०७१
तस्कर र प्रहरीबीच गोली हानाहान
अञ्चल प्रहरी कार्यालय नारायणी वीरगन्ज र लागुऔषध कारोबारीबीच २९ मंसीर बिहान सुगौली विर्ता गाविसमा गोली हानाहान भएको छ । नेपालबाट भारततर्फ लैजान लागिएको लागुऔषध प्रहरीले नियन्त्रणमा लिन खोज्दा तस्कर र प्रहरीबीच दोहोरो गोली हानाहान भएको हो ।
नेपालबाट भारततर्फ लागुऔषध लैजान लागिएको पूर्व सूचनाका आधारमा प्रहरीले कारबाही गर्न खोज्दा तस्कर समूहले २५ राउन्ड गोली चलाएको र जवाफमा सानो तथा ठूलो हतियारबाट नौ राउन्ड गोली चलाई स्थिति नियन्त्रणमा लिएको अञ्चल प्रहरी कार्यालय नारायणीका प्रहरी नायव निरीक्षक अरुण कुशवाहाले जानकारी दिए ।
प्रहरीले गरेको प्रतिकारबाट तस्करले ठूलो परिमाणमा चरेस घटनास्थलमा नै छाडी भागेको प्रहरीको भनाइ छ । बरामद गरिएका लागुऔषधको तौल हाल यकिन गर्न नसकिए पनि ४०० किलोभन्दा बढी रहेको प्रहरीको अनुमान छ ।
रासस