तातोपानी नाकाबाट काठमाडौं ल्याउँदै गरेको २३ किलो अवैध सुन जगाती प्रहरी कार्यालय भक्तपुरले बरामद गरेको छ । स्याउ लोड गरेर काठमाडौं ल्याउँदै गरेको ना २ ख ५०५८ नम्बरको कन्टेनर भ्यान चेकजाँचको क्रममा सुन बरामद गरेको जगाती प्रहरी कार्यालयकी प्रमुख डीएसपी किरण राणाले जानकारी दिइन् ।

राणाका अनुसार विशेष सुराकीको आधारमा २९ मंसीर राति १ बजे कन्टेनर चेकजाँचको क्रममा अवैध सुन फेला परेको हो । “कन्टेनर चालकको पछाडि दाहिनेतर्फको झ्यालमा फल्स बटम बनाइ चाइनिज पत्रिकाले बेरेर लुकाएको अवस्थामा सुन फेला परेको हो,” डीएसपी राणाले बताइन् ।

प्रहरीले कन्टेनरसँगै चालक, सहचालक र एक जनालाई नियन्त्रणमा लिएका छन् । चालकले सोधपुछको क्रममा कन्टेनर भ्यान सिन्धुपाल्चोक तातोपानीका घ्यालसेङ शेर्पाको भएको बताएको प्रहरीको भनाइ छ ।

प्रहरीका अनुसार एक चिनियाँ व्यक्तिले सुन भित्र्याउँदै गरेको प्रारम्भिक अनुसन्धानबाट देखिएको छ ।

प्रतिकृया दिनुहोस