अल्बानियाली वातावरण सहायकमन्त्री डायना बेज्कोलाई प्रधानमन्त्री एडी रामाको आदेशबाट निष्कासन गरिएको अल्बानिया डेली न्युजले जनाएको छ ।

कयौँ महिनासम्म विद्युत् महसुलको बिल भुक्तानी नगरेकाले अल्बानियाकी सहायकमन्त्री डायना बेज्कोलाई त्यहाँका प्रधानमन्त्रीले पदबाटै निष्कासन गरेका छन् ।

उत्तरपश्चिम अल्बानियाको भेलिपोजा समुन्द्र किनारमा रहेको उनको दोस्रो घरमा खपत भएको विद्युत् आपूर्ति महसुलका बिल महिनौँसम्म भुक्तान नगरिएको तथ्य विद्युत् वितरण निकाय (ओएसएचइई)ले पत्ता लगाएको थियो ।

यद्यपि उक्त विद्युत् महसुलको रकम धेरै ठूलो नभए तापनि सरकार प्रमुखलाई कारबाही गर्नबाट रोक्न सकेन ।

प्रधानमन्त्री रामाले सामाजिक सञ्जालमा जारी गरेको सन्देशमा सार्वजनिक उच्चपदमा रहेका व्यक्तिले विद्युत् महसुल भुक्तानी नगरेको सम्बन्धमा कुनै न्यायिक कारण नभेटिएको उल्लेख गरेका छन् ।

अल्बानियाको उत्तरपश्चिम सहर स्कोड्रामा समाजवादी पार्टीका तर्फबाट विजयी सांसद बेज्कोलाई सहायक मन्त्री बनाइएको थियो ।

बेज्कोले भने विद्युत् महसुलमा भुक्तानी नगरेका कारण नभई अन्य कारणबाट आफूलाई पदमुक्त गरेको दाबी गरेकी छन् ।

यस्तै अल्बानियाले अन्य सरकारी कर्मचारीहरू कसैले विद्युत् महसुल तिर्न बक्यौता राखेका छन् भन्ने विषयमा मन्त्री परिषद्ले एक कार्यदलसमेत गठन गरेको छ ।
सिन्ह्वा

प्रतिकृया दिनुहोस