नेपाल आयल निगमले तत्कालै पेट्रोलियम पदार्थको मूल्य घटाउन नसकिने जनाएको छ । विद्यार्थी संगठनले अझै मूल्य घटाउन २४ घण्टे अल्टिमेटम दिए पनि पेट्रोलियम पदार्थको मूल्य तत्काल घटाउन नसकिने निगमको भनाइ छ ।

निगमका प्रवक्ता मुकुन्द घिमिरले हिमालखबरसँग भने, “इण्डियन आयल कर्पोरेशन (आईओसी) बाट नयाँ मूल्य नआएसम्म भाउ घटबड हुँदैन ।” आईओसीले हरेक १५ दिनमा नेपाल आयल निगमलाई नयाँ मूल्य पठाउने गर्छ ।

आईओसीले २९ मंसीरमा पठाएको मूल्य अनुसार आयल निगमले ४ पुसमा पेट्रोलियम पदार्थको मूल्य घटाएको थियो । निगमले पेट्रोलमा रु.७, डिजेल तथा मट्टितेलमा रु.५.५० र हवाई इन्धनमा रु.१० मूल्य घटाएको थियो ।

तर, विद्यार्थी संगठनले भने पेट्रोलियम पदार्थको मूल्य अझै घटाउन २४ घण्टे अल्टिमेटम दिएका छन् । ७ पुसमा बसेको विद्यार्थी संगठनको बैठकले पेट्रोलियम पदार्थको मूल्य अझै घटाउन सरकार र नेपाल आयल निगमलाई २४ घण्टे अल्टिमेटम दिने निर्णय गरेको हो ।

निगमका प्रवक्ता घिमिरेले अन्तर्राष्ट्रिय बजार मूल्य अनुसार नै ४ पुसमा पेट्रोलियम पदार्थको मूल्य घटाउने निर्णय भएको बताए । “निगमले संभव भएसम्म बढी मूल्य घटाउने निर्णय गरेको हो,” उनले भने, “मूल्य समायोजनका लागि २४ घण्टा होइन, अझै सातादिन कुर्नुपर्छ ।”

प्रतिकृया दिनुहोस