थप समाचारसोमबार, पौष ७, २०७१
संविधान बन्न नदिन मोर्चाबन्दीः ओली
नेकपा एमाले अध्यक्ष केपी शर्मा ओलीले संविधान बन्न नदिनकै लागि एमाओवादीमो नेतृत्वमा मोर्चा गठन गरिएको आरोप लगाएका छन् । सर्लाहीमा ७ पुसमा आयोजित पत्रकार सम्मेलनमा उनले भने, “एमाओवादीको नेतृत्वमा गठित २२ दलीय मोर्चा संविधान आउन नदिनका लागि हो ।”
उनले कसैको आन्दोलन, रक्तपात जस्तो धम्कीले कुनै अर्थ नराख्ने पनि टिप्पणी गरे । उनले सहमतिको प्रयास चलिरहँदा एमाओवादी अध्यक्ष पुष्पकमल दाहाल बुरुक्क उफ्रिन थालेको कटाक्ष गरे ।
“हामी त सहमतिकै पक्षमा छौँ र त्यसअनुसार नै अगाडि बढिरहेका छौँ”, उनले भने, “तर कमिलाले टोक्यो कि के हो, एमाओवादी अध्यक्ष त बुरुक्क उफ्रन थाल्नुभयो ।”
उनले जस्तोसुकै अवरोध पन्छाएर भए पनि ८ माघमा नयाँ संविधान जारी हुने दावी गरे । सहमति सम्भव नभए प्रक्रियाबाटै नयाँ संविधान जारी हुने उनको भनाइ छ ।