अर्थ/बजारमंगलबार, पौष १५, २०७१
दूधको मूल्य बढ्यो
दुग्ध विकास संस्थान (डीडीसी) ले दूधको मूल्य बढाएको छ । १५ पुसमा बसेको डीडीसीको संचालक समितिको बैठकले किसानले प्रतिलिटर रु.५.५२ थप पाउने गरी दूधको मूल्य बढाउने निर्णय गरेको हो ।
डीडीसीका महाप्रबन्धक गंगा तिम्सिनाले बढेको दूधको मूल्य १६ पुसदेखि लागू हुने हिमालखबरसँग बताए । किसानले लामो समयदेखि दूधको मूल्य बढाउनुपर्ने माग राख्दै आएका थिए ।
तर, डीडीसीले दूधमा किसानले पाउने भन्दा थप रकम पनि बढाएको छ । तिम्सिनाले नीलो प्याकेट (स्ट्यान्डर्ड दूध), हरियो प्याकेट (फ्याटयुक्त दूध) र गाईको दूधमा नै मूल्य बढाएको जानकारी दिए ।
डीडीसीले नीलो प्याकेट तथा गाईको दूधमा रु.८ र हरियो प्याकेटको मूल्यमा रु.१० मूल्यवृद्धि गरेको छ । मूल्यवृद्धि भएपछि अब नीलो प्याकेटको रु.६४, गाईको दूध रु.७२ र हरियो प्याकेटको रु.८० प्रति लिटर पर्नेछ ।
महाप्रबन्धक तिम्सिनाले किसानको लागत खर्च बढेकाले दूधको मूल्य बढाएको बताए । “बढेको मूल्यको ७९ प्रतिशत रकम अब किसानले पाउने छन्,” उनले भने ।