थप समाचारशुक्रबार, पौष २५, २०७१
मोटरसाइकल दुर्घटनामा रेडियोकर्मीको मृत्यु
पाल्पामा भएको सडक दुर्घटनामा रेडियोकर्मीको ज्यान गएको छ । विपरित दिशाबाट आएको ट्रकमा ठोक्किएर मोटरसाइकलमा सवार मदनपोखरा–६ का गोविन्द देवकोटाको मृत्यु भएको होे ।
ट्रकमा ठोक्किएर घाइते भएका देवकोटाको उपचारका क्रममा लुम्बिनी मेडिकल कलेजमा मृत्यु भएको प्रहरीले जनाएको छ । देवकोटा सञ्चारकर्मी तथा गायक थिए । यसअघि पाल्पाको रेडियो मुक्तिनाथ, गुल्मीको रेशुङ्गा र स्काई एफएममा काम गरेका उनी हाल राजधानीको एफएममा कार्यरत थिए ।
स्याङजाबाट बुटवलतर्फ जाँदै गरेको लु १ ख ७८२४ नम्बरको ट्रक र बुटवलबाट स्याङजातर्फ जाँदै गरेको लु १४ प ५४१७ नम्बरको मोटरसाइकल आपसमा ठोक्किएका हुन् । दुर्घटनामा मोटरसाइकलमा सवार बुटवल– १२ बस्ने ३६ वर्षका विशाल क्षेत्री घाइते भएका छन् ।
घाइते क्षेत्रीको पनि अवस्था गम्भीर रहेको अस्पतालले जनाएको छ । दुर्घटनाग्रस्त ट्रक र मोटरसाइकललाई नियन्त्रणमा लिएर प्रहरीले थप अनुसन्धान गरिरहेको छ ।
देवकोटाका पत्नी र २ बर्षकी छोरी छन् ।
देब पचभैया, पाल्पा