वैदेशिक रोजगारीका लागि विदेशिएका ४६१ नेपाली कामदारको मृत्यु भएको वैदेशिक रोजगार प्रवद्र्धन बोर्डले जनाएको छ । यस आर्थिक वर्षको ६ महीनामा ४६१ नेपाली कामदारको मृत्यु भएको हो ।

वैदेशिक रोजगारीमा जाने नेपालीको सङ्ख्यामा वृद्धि भएसँगै विदेशिएका नेपाली कामदारको मृत्युको सङ्ख्या पनि बढ्न थालेको बोर्डको भनाइ छ ।

बोर्डको तथ्यांक अनुसार ६ महीनामा मलेशियामा सबैभन्दा बढी २०७ जना नेपाली कामदारको मृत्यु भएको छ । साउदी अरबमा १२८, कतारमा ६९, दुबईमा २७, कुबेतमा १५, बहराइनमा ६ र दक्षिण कोरियामा ३ जनाको मृत्यु भएको छ ।

जापान, ओमान र रुसमा भने एक/एक जनाको मृत्यु भएको बोर्डले जनाएको छ । मृत्यु हुनेमध्ये ४५८ पुरुष र तीन जना महिला छन् ।

तथ्याङ्कअनुसार औशतमा महीनामा ७७ जना नेपालीको विदेशमा मृत्यु हुने गरेको छ । यो तथ्यांकमा रोजगारीबाहेक पढ्न र अन्य कामका क्रममा विदेशमा मृत्यु भएकाको संख्या समावेश नगरिएको बोर्डका कार्यकारी निर्देशक रघुराज काफ्लेले बताए ।
रासस

प्रतिकृया दिनुहोस