थप समाचारबिहीबार, माघ ८, २०७१
बाहिरिंदै गर्दा ओलीले भने, ‘देशले दुःख पाउने भयो’
एमाले अध्यक्ष एवम् सभासद केपी ओली संविधानसभा बैठकबाट बाहिरिएका छन् । बाहिरिदै गर्दा उनले देशले थप दुःख पाउने अवस्था आएको बताए ।
एमाओवादी र मधेशी मोर्चाका सभासदले अवरुद्ध पारेको संविधानसभा बैठकबाट बाहिरिएका एमाले अध्यक्ष केपी ओलीले देशले थप दुःख पाउने अवस्था आएको बताएका छन् ।
बाहिरिंदै गर्दा ओलीले एमाओवादीले संविधान बनाउन नचाहेको आरोप भन्दै थपे, “माओवादीजस्तो दल संविधानसभामा भएपछि, देशले दुःख त पाउने नै भो नि,”
संविधानसभा भन्दा बाहिर रहेका संविधान विरोधीसँग मोर्चाबन्दी गरेको एमाओवादीले संविधान बन्न नदिएर देश र जनतालाई थप दुःख दिन खोजेको ओलीले आरोप लगाए ।
झलनाथ खनाल
एमाओवादी र मधेशकेन्द्रित दलहरुले अवरोध गरिरहेकै बेला एमाले वरिष्ठ नेता झलनाथ खनाल पनि बाहिर आएका छन् ।
उनले दलहरुबीच असहमति कायमै रहेकोले प्रक्रियामा गएर मतदानबाटै संविधान जारी गरने बताए ।
उनले भने, “हामी जसरी भए पनि प्रक्रियालाई अघि बढाउँछौं । हामी संविधान ल्याउँछौं । जस्तासुकै अवरोध र व्यवधानलाई लोकतान्त्रिक तरिकाले व्यवस्थापन गर्दै चाँडै संविधान ल्याउँछौं ।”