विश्व क्रिकेट लिग डिभिजन–२ मा चौंथो स्थानमा सीमित भए पनि नेपाली राष्ट्रिय टोलीले डिभिजन–१ को प्रतियोगिता खेल्न पाउने भएको छ । नेपालले चार वर्षछि हुने वानडे विश्वकप छनोट पनि खेल्नेछ ।

नामिबियामा १० माघमा सम्पन्न डिभिजन–२ प्रतियोगितामा नेपाल चौंथो स्थानमा रहँदै हैसियत जोगाउन सफल भएको थियो । ६ टीम सहभागी रहेको प्रतियोगितामा शीर्ष दुई टोली डिभिजन–१ मा बढुवा हुने, तेस्रो तथा चौंथो टीम डिभिजन–२ मा यथावत रहने र पुछारका दुई टोली रेलिगेसनमा पर्ने प्रावधान थियो ।

अन्तर्राष्ट्रिय क्रिकेट परिषद् (आईसीसी) ले भने तेस्रो भएको केन्या र चौंथो नेपाललाई पनि डिभिजन–१ हैसियतको विश्व क्रिकेट लिग च्याम्पियनसिप खेल्न मौका दिने तयारी गरिरहेको छ । १४–१५ माघमा दुबईमा हुने आईसीसी कार्यसमिति बैठकले यससम्बन्धी औपचारिक निर्णय गर्ने नेपाली राष्ट्रिय टोलीका प्रशिक्षक पुबुदु दासानायकेलाई उद्धृत गर्दै नेपाल क्रिकेट संघ (क्यान) स्रोतले जनाएको छ ।

शीर्ष दुई टोलीले डिभिजन–१ मा रहेका टोलीसँग ५० ओभरको विश्व क्रिकेट लिग च्याम्पियनसिप तथा चार दिवशीय स्वरुपको अन्तरमहादेशीय कप खेल्न पाउने प्रावधान थियो । विश्वकप छनोटको अन्तिम चरणमा पनि डिभिजन–१ मा उक्लिने दुई टोलीलाई मात्र मौका दिने योजना थियो ।

आईसीसीले भने डिभिजन–२ का शीर्ष चारभित्र पर्ने टोलीलाई ५० ओभरको विश्व क्रिकेट लिग च्याम्पियनसिप तथा विश्वकप छनोटमा खेलाउने सोच बनाएको स्रोतको भनाइ छ । तर, नेपालले अन्तरमहादेशीय कप भने गुमाउने छ ।

नागरिक दैनिकबाट साभार

प्रतिकृया दिनुहोस