थप समाचारबुधबार, माघ १४, २०७१
गरिब घरपरिवार पहिचानको क्रम अन्तिम चरणमा
सरकारले वितरणको तयारी गरेको गरिब घरपरिवार परिचयपत्रका लागि पहिचानको क्रम अन्तिम चरणमा पुगेको छ ।
गरिबीको रेखामुनि रहेका २५ जिल्लाका गरिब घरपरिवारलाई चालु आर्थिक वर्षभित्रै परिचयपत्र प्रदान गर्ने तयारीस्वरुप गरिब घरपरिवार पहिचान र परिचयपत्र व्यवस्थापन तथा वितरण समन्वय बोर्डले पहिचानको अन्तिम तयारी गरेको हो ।
बोर्डका निर्देशक ढुण्डीराज लामिछानेका अनुसार परिचयपत्र वितरण गर्ने योजनाअनुसार त्यसका लागि विभिन्न मापदण्डका आधारमा गरिएको स्थलगत अध्ययनको विवरण सङ्कलन गरी पहिचानको अन्तिम तयारी भइरहेको छ ।
परिचयपत्र वितरणका लागि छनोट भएका २५ जिल्लामा अछाम, बझाङ, बाजुरा, कैलाली, जुम्ला, हुम्ला, मुगु, डोल्पा, कालीकोट, जाजरकोट, बर्दिया, रुकुम, रोल्पा र प्यूठान रहेका छन् ।
त्यस्तै अर्घाखाँची, कपिलवस्तु, तनहँ, बागलुङ, गोरखा, रामेछाप, सिन्धुली, रौतहट, सिरहा, खोटाङ र भोजपुरमा परिचयपत्र वितरण गरिने छ ।
गरिब घरपरिवार पहिचानका क्रममा परिवारको आम्दानी तथा खर्चलगायत विवरण सङ्कलन गरिएको जानकारी गराउँदै निर्देशक लामिछानेले व्यक्तिभन्दा पनि परिवारको अवस्थालाई आधार बनाएर विवरण सङ्कलन गरिएको बताउनुभयो ।
परिचयपत्र वितरणका लागि पहिचानपछि त्यसलाई जनस्तरमा गुनासो सङ्कलनका लागि पठाइने र अन्तिम रुप दिइने छ ।
बोर्डका कार्यकारी उपाध्यक्ष चिन्तन पौडेलले परिचयपत्र वितरणसँगै गरिब घरपरिवार भएकालाई राज्यबाट प्रदान गरिने सेवा तथा सुविधा वितरण प्रभावकारी हुने तथा राज्यबाट प्रदान गरिने सेवासुविधामा उनीहरुको सहज पहुँच कायम हुने बताए ।
रासस
सम्बन्धित समाचारः
गरीब भेटेन सरकारले