थप समाचारबिहीबार, माघ १५, २०७१
राहदानीबारे जानकारी एसएमएसबाटै
जिल्ला प्रशासन कार्यालय चितवनले सेवाग्राहीलाई एसएमएसबाटै राहदानी आए नआएको बारेमा जानकारी दिने भएको छ ।
सेवाग्राहीको सहजताका लागि उक्त प्रविधिको प्रयोग गर्न लागिएको प्रमुख जिल्ला अधिकारी मानबहादुर विकले जानकारी दिए । अब आउने लटको राहदानी एसएमएसबाटै जानकारी दिने तयारी गरेको उनले बताए ।
तपाईंको राहदानी आयो अथवा तपाईंको राहदानी बन्न सकेन, कार्यालयमा सम्पर्क गर्नुहोलालगायत सन्देश एसएमएसबाटै सेवाग्राहीको मोबाइलमा जाने गर्दछ । उक्त सेवाका लागि आवश्यक उपकरण आइसकेको र प्रविधि जोड्ने कामसमेत अन्तिममा पुगेको प्रशासन कार्यालयले जनाएको छ ।
जिल्लामा हरेक १५ दिनेको अन्तरालमा राहदानी आउने गरेको छ । मासिक करिब तीन हजार राहदानी बन्ने गरेको छ ।
सेवाग्राहीलाई न्युनतम ४५ दिनको म्याद दिएर राहदानी लिन आउन भनिएको हुन्छ । “अब त्यो पनि भन्नुपरेन,” उनले भने, “मोबाइल सन्देश कुरेर बसे हुन्छ ।”
रासस