कैलालीमा सम्पन्न एसपीए कप क्रिकेटको उपाधि न्यू होराइजन कलेज भैरहवाले जितेको छ ।

२४ माघमा भएको फाइनल खेलमा न्यू होराइजन भैरहवाले भैरहवाकै सनसाइन कलेजलाई ७ रनले पराजित गर्दै उपाधिसहित रु. ५ लाख हात पारेको छ ।

टस जितेर पहिले ब्याटिङ गरेको न्यू होराइजनले निर्धारित २० ओभरमा ६ विकेट गुमाउँदै १७१ रन बनायो । सोमपाल कामीले तीन चौका र दुई छक्काको मद्दतले ४० रन बनाए ।

सन्दिप सुनारले २१ बलमा ५ चौका र एक छक्काको मद्दतमा ३४, निर्मल थापाले २६, शौरभ खनालले २४ र प्रकाश केसीले २३ रन बनाए ।

सनसाइनलका दीपेन्द्र यादवले २ विकेट लिए । मनबहादुर थापा, सुवोध श्रीनिवास र शवन अलीले समान १-१ विकेट लिए ।

१७२ रनको विजयी लक्ष्यसाथ मैदान उत्रिएको सनसाइन १९.५ ओभरमा १६४ रन बनाएर अलआउट भयो ।

सनसाइनका लागि सुबोधले ४६, मायंक यादवले ४४ र अन्तिम थापाले ३७ रन बनाएका थिए ।

न्यू होराइजनलाई उपाधि दिलाउने क्रममा शक्ति गौचन र शौरभ खनालले समान ३-३ विकेट लिए । सोमपाल कामी र सुसन भारीले एक-एक विकेट लिए । शौरभ म्यान अफ दि म्याच बने भने शौरभ खनाल प्लेयर अफ दि सिरिज घोषित भए ।

कैलाली बहुमुखी क्याम्पसका विपिन रावल राइजिङ प्लेयर, दुर्गालक्ष्मी बहुमुखी क्याम्पसका विनोद लामा उत्कृष्ट फिल्डर, पेन्टागनका राहुल विक उत्कृष्ट बलर तथा सुनराइजका अमृत श्रेष्ठ उत्कृष्ट ब्याट्सम्यान घोषित भए ।
दीर्घराज उपाध्याय, कैलाली

प्रतिकृया दिनुहोस