थप समाचारशनिबार, फाल्गुण २, २०७१

सकारात्मक वातावरण बनेको छ: प्रम

हिमालखबर

dahal_koiralaसंविधान निर्माणको प्रक्रियामा दलहरुबीच विवादका साथ तिक्तता बढे पनि अब संवादहीनताको अन्त्य भएको छ ।

प्रधानमन्त्री सुशील कोइराला र प्रमुख प्रतिपक्षी दल एमाओवादी अध्यक्ष पुष्पकमल दाहालबीच भएको वार्ता र लामो संवादले सहमतिको सकारात्मक वातावरण बनेको हो ।

प्रधानमन्त्री निवास बालुवाटारमा दुई नेताबीच भएको कुराकानीमा दलबीचको तिक्ततालाई तोडेर कसरी सहमतिका साथ संविधान जारी गर्ने भन्नेबारे कुराकानी भएको थियो ।

छलफलपछि दुवै नेताले दिएको प्रतिक्रियाअनुरुप पनि गहिरिँदो दलीय संवादहीनता र गतिरोधको अन्त्य भई सहमतिमा संविधान जारी गर्ने नयाँ सम्भावना देखिएको छ । छलफलपछि प्रधानमन्त्री सुशील कोइरालाले समस्या समाधान गरी कसरी अघि बढ्ने भन्नेबारे कुराकानी भएको र वार्ताको वातावरण बनाउनाको विकल्प नरहेको उल्लेख गरे ।

“वार्ताका लागि मैले पटक पटक पहल गरिराछु, सहमति र एकताबाट नै समस्या समाधान गर्नुपर्छ भनेर मैले भने, उहाँले पनि चिन्ता जनाउनुभएको छ, आजको कुराकानीले सकारात्मक वातावरण बनाएको छ”, उनले भने ।

प्रधानमन्त्री कोइरालाले संवाद, सहमति, सहकार्य र एकताले मात्रै मुलुकको समस्या समाधान गर्न सकिने बताउँदै सञ्चारमाध्यममार्फत प्रतिपक्षी दललाई पुनः वार्ताका लागि आह्वान गरे । उनले भने, “सहमतिको वातावरणका निम्ति सबै चिन्तित हुनुहुन्छ, हामीहरु चाँडै बस्छौँ र वार्ताको वातावरण बनाउँछौँ, संवादले समस्याको टुङ्गो लगाउँछ भन्नेमा म विश्वस्त छु ।”

सत्तारुढ नेपाली कांग्रेस र नेकपा एमाले तथा प्रमुख प्रतिपक्षी दल एमाओवादीसहित मधेसकेन्द्रितबीच बोलचाल त बन्द भई एकले अर्कालाई सार्वजनिक कार्यक्रममा आपत्तिजनक अभिव्यक्ति दिँदै दूरी बढाएका थिए ।

संविधानसभामा सहमतिमा संविधान जारी गर्नुपर्नेमा दलहरु सहमत भए पनि आफ्ना दलीय अडानबाट टसको मस हुन नसक्दा अन्तत्वोगत्वा प्रक्रियामार्फत संविधान जारी गर्ने दिशामा सत्तारुढ दलले कसरत थालेपछि उक्त प्रक्रियामा असन्तुष्टि जनाउँदै प्रतिपक्षी दल चिढिएका थिए ।

तथापि प्रक्रियाप्रति रुष्ट बनेको एमाओवादी तथा मधेसकेन्द्रित दलसँग विभिन्न माध्यमबाट प्रधानमन्त्री कोइरालाले सहमतिका लागि वार्ता र संवादको पहलकदमी गर्दै आएका थिए।

संवादबाट नै समाधान खोजिनुपर्ने
प्रधानमन्त्रीसँगको छलफलपछि सञ्चारकर्मीलाई प्रतिक्रिया दिँदै एमाओवादी अध्यक्ष दाहालले आजको छलफलले वार्ताको सकारात्मक वातावरण बन्दै गएको भन्दै यसलाई औपचारिकता दिन अझै सरकारले पहल गर्नुपर्नेमा जोड दिए ।

“म ३० दलीय मोर्चाका तर्फबाट नभई प्रतिपक्षी दलको हैसियतमा प्रधानमन्त्रीसँग कुरा गर्न आएको हुँ, यसले वार्ताको सकारात्मक वातावरण बनाएको छ, औपचारिक वार्ताका लागि अझै गृहकार्य गर्न जरुरी छ, संसद् स्थगन गर्नु सकारात्मक कुरा हो, संवादबाट नै समस्याको निकास खोजिनुपर्छ”, अध्यक्ष दाहालले भने ।

प्रधानमन्त्री कोइराला र अध्यक्ष दाहालबीच भएको लामो संवादले सहमतिबाटै अघि बढेर संविधान जारी गर्ने विश्वासिलो वातावरण सिर्जना भएको छ, यसले दलहरु मिलेर सहमतिबाटै मुलुकको समस्या समाधान गर्न सक्छन् भन्ने सन्देश दिनाका साथै जनताको निराशालाई सम्भावनामा परिणत गराएको छ ।

प्रतिकृया दिनुहोस

हिमालखबर जनमत

नयाँ सरकारको नेतृत्व कुन पार्टीले गर्नुपर्छ?

परिणाम हेर्नुस्

Loading ... Loading ...